РФ плануе пабудаваць першы паўнавартасны авіяносец за гісторыю расійскага і савецкага ваенна-марскіх флатоў, паведаміла ТАСС са спасылкай на галоўнакамандуючага ВМФ Расіі Віктара Чыркова.
«Авіяносец у флота будзе. Вядуцца працы адпаведнымі навукова-даследчыцкімі арганізацыямі», — сказаў Чыркоў.
Раней начальнік марской авіяцыі ВМФ РФ Ігар Кожын казаў у эфіры радыё «Эхо Москвы», што будаўніцтва авіяносца зойме 8-10 гадоў. Калі пачнецца закладка карабля — невядома.
Магчымы новы авіяносец будзе мець водазмяшчэнне ў 75 000-80 000 тон і авіягрупу ў больш за 60 самалётаў і верталётаў.
Зараз у складзе расійскага флота ёсць толькі адзін карабель, які мае значную групоўку баявой авіяцыі — крэйсер «Адмірал флота Савецкага Саюза Кузняцоў». Яго будавалі на Чарнаморскім суднабудаўнічым заводзе ў Мікалаеве, які зараз належыць Украіне.
Аднак «Кузняцоў» з-за значнай колькасці ракетнага ўзбраення пры дастаткова вялікім водазмяшчэнні да 61 000 тон зараз нясе толькі 30 самалётаў — 14 знішчальнікаў Су-33, 2 вучэбныя самалёты на базе штурмавіка Су-25УБ, 14 знішчальнікаў МіГ-29К і МіГ29КУБ. Плануецца, што ў 2015 годзе колькасць самалётаў на «Кузняцове» павялічыцца да максімума — 38-40 машын.
Для параўнання — пабудаваны праз 10 год французскі авіяносец «Шарль дэ Голь» нясе да 40 самалётаў розных тыпаў пры водазмяшчэнні да 42 000 тон.
Да таго ж «Кузняцоў» не мае паўнавартасных паравых катапульт, што не дае магчымасці яму мець на борце цяжкія машыны, перш за ўсё — самалёты далёкага радыёлакацыйнага выяўлення (ДРЛВ). У выніку ягоныя магчымасці па выяўленні праціўніка значна абмежаваныя ў параўнанні, напрыклад, з амерыканскімі караблямі.
Будаўніцтва новага авіяносца можа быць пачатае на заводзе «Севмаш», які зараз праходзіць рэканструкцыю, а потым будзе рамантаваць «Кузняцова». Па словах намесніка галоўнакамандуючага ВМФ РФ Віктара Бурсука, першы такі карабель можа ўвайсці ў склад флота толькі пасля 2030 года.
Кошт распрацоўкі і пабудовы такога карабля на Захадзе можа быць болей за $5 мільярдаў без уліку пакупкі самалётаў. Да таго ж авіяносец будзе патрабаваць і групоўку іншых караблёў для сваёй абароны.
Зараз ЗША маюць 10 авіяносных ударных групаў, кожная з якіх пабудаваная вакол авіяносца класа Nimitz з водазмяшчэннем больш за 100.000 тон і 85-90 самалётамі і верталётамі на борце.
Каментары