У Беларусі для забесьпячэньня больш поўнай абароны правоў журналістаў насьпела неабходнасьць унесьці некаторыя папраўкі ў закон аб сродках масавай інфармацыі, мяркуе старшыня Пастаяннай камісіі па правах чалавека, нацыянальных адносінах і СМІ Палаты прадстаўнікоў.
«Паводле існуючага сёння закона, на журналіста могуць падаць у суд праз 10 і праз 20 гадоў пасля выхаду ў свет яго публікацыі. Павінен быць устаноўлены тэрмін даўнасці для звароту ў суд таго, каго не задавальняе публікацыя, напрыклад, на працягу года», — лічыць парламентарый.
Пажадана таксама, дадаў ён, стварыць у рэспубліцы пэўны кодэкс паводзін журналіста. «Мы, напэўна, яшчэ не дайшлі да гэтага, але гэта трэба рабіць. Журналіст павінен разумець, што мяне можна здымаць у рабочым кабінеце ў час выканання службовых абавязкаў, але не трэба здымаць, калі я наведваю гастраном, і паведамляць чытачам, што я там купляю», — адзначыў Юрый Кулакоўскі.
На яго думку, дзяржаўныя сродкі масавай інфармацыі ў Беларусі з’яўляюцца самымі свабоднымі ў сваёй дзейнасці.
«Я лічу, што больш свабодных сродкаў масавай інфармацыі, чым дзяржаўныя, няма. Мы цудоўна разумеем, што той, хто плаціць, той і заказвае музыку. Дзяржаўным СМІ не паступае спецыяльных заказаў некага «раскруціць» або некага абліць граззю за канкрэтныя канверты грошай», — сказаў дэпутат.
Каментары