Магіла маці Лукашэнкі ўзятая пад ахову, яе забаронена фатаграфаваць
Маці Аляксандра Лукашэнкі Кацярыну Трафімаўну пахавалі 26 мая на могілках вёскі Хімы, што ў Аршанскім раёне Віцебскай вобласці. Яны непадалёк ад роднай вёскі кіраўніка дзяржавы — Александрыі-2, дзе Кацярына Трафімаўна пражыла амаль усё жыццё.
Магіла нябожчыцы — уся ў вянках.
Фатаздымкі магілы і саміх могілак давялося выдаліць. На гэтым настаялі двое мужчын, якія назваліся «прадстаўнікамі сям’і нябожчыцы». Сваю настойлівую просьбу яны патлумачылі нежаданьнем родзічаў Кацярыны Трафімаўны, каб такія фатаздымкі зьяўляліся ў прэсе да сарака дзён па нябожчыцы.
На пахаванні «былі сваякі, суседзі, тыя, з кім яна працавала. Пахавалі яе з хрысціянскай пашанаю, — расказала карэспандэнту радыё «Свабода» аднавяскоўка Кацярыны Лукашэнкі. — Шмат добрага пра яе казалі. Плакалі. Яна чэснай была працаўніцай. Рабіла цялятніцай, даяркай. Гэта цяпер усё механізавана, а тады ўсё ж рукамі даводзілася рабіць. Сына годнага выгадавала. Яна ім дужа ганарылася», — зазначыла жанчына.
Усе, з кім давялося пагутарыць, адзначалі, што ў Мінск да сына яна не дужа хацела ехаць. «Паехала, калі ў яе не было ўжо сіл», — зазначыў яшчэ адзін суразмоўца.
«Жыла яна ў Александрыі-2. Домік іхны знеслі, які пабудавалі пасля пажару ў 1958 годзе. Калі пачалі ў Александрыі будаваць катэджы, то яна перабралася ў адзін з іх. На месцы знесенага старога дома пабудавалі новы», — кажа ён.
«Александрыю яна дужа любіла. Яна родам адсюль. Раней жа тут хутары адны былі. Потым людзей з хутароў аб’ядналі, і ўтварыўся такі пасёлак, у якім Кацярына Трафімаўна і жыла».
Пра смерць Кацярыны Трафімаўны Лукашэнкі стала вядома 26 мая. У гэты ж дзень яе пахавалі. Пражыла маці кіраўніка беларускай дзяржавы 90 гадоў.
Цяпер чытаюць
«Сядзеў ужо 50 сутак, затрымалі яго дзяўчыну і брата». Сукамернік расказаў пра радыёаматара, арыштаванага за здраду дзяржаве4
Каментары