Асцярожна, Windows абнаўляецца: небяспечны момант апдэйта да «дзясяткі»
Microsoft хоча зрабіць вам прыемна, але калі ў вас падключаны лімітаваны інтэрнэт, можа выйсці наадварот.
Фінальная версія Windows 10 мае выйсці 29 ліпеня. Яна будзе каштаваць 110-150 даляраў, але карыстальнікі ліцэнзійных «сямёркі» і «васьмёркі» атрымаюць яго бясплатна. Адна праблема: Microsoft за дзень да рэлізу пачынае таемна запампоўваць файлы інсталяцыі, калі карыстальнік зарэзерваваў для сябе абнаўленне. Сама інсталяцыя мае прайсці ў дзень рэлізу, 29 ліпеня.
Небяспека ў тым, што абнаўленне запампоўваецца самастойна, незаўважна для карыстальніка. Калі камп’ютар падлучаны да лімітаванага — напрыклад, мабільнага — інтэрнэту, карыстальнік можа страціць каля 3 Гб трафіку.
Варта быць асцярожным, калі вы карыстаецеся лімітаваным інтэрнэтам і замаўлялі сабе «аўтадастаўку» абнаўлення. Дарэчы, надалей не атрымаецца адключыць аўтаматычныя абнаўленні — «дзясятка» будзе цягнуць усе «латкі» ў прымусовым парадку.
Увагу на гэта звярнулі карыстальнікі reddit ды іншых форумаў і блогаў. Файлы абнаўлення пачалі з’яўляцца ў схаванай дырэкторыі $Windows.~BT на сістэмным дыску. Калі такой дырэкторыі няма, а вы хочаце пахутчэй атрымаць абнаўленне, запусціце службу Windows Update уручную.
Абнаўленне можа несці нязручнасці: праблемы з драйверамі, «вылеты» праграмы абнаўлення, раптоўныя «тармазы»… Будзьце гатовыя да таго, што новая Windows 10 у першыя дні можа быць «сырой». Затое яе абяцаюць бясплатна абнаўляць яшчэ дзесяць год — «дзясятка» можа стаць наогул «апошняй Windows».
Сярод галоўных навінак Windows 10 у настольнай версіі інтэграцыя галасавога памочніка Cortana, вяртанне звыклага меню «Пуск», а таксама перапрацаваны стандартны браўзер — ужо не Internet Explorer, а Microsoft Edge. Акрамя настольнай, на восень запланаваны выпуск і мабільнай Windows 10 (агулам «дзясятак» будзе сем).
Аўтаматычныя абнаўленні да Windows 10 тычацца толькі ўладальнікаў ліцензійных версій Windows 7 ды Windows 8. Карыстальнікам XP прыйдзецца абнаўляцца ўручную. Піратам жа, абяцае Microsoft, прыйдзецца памучыцца. Ды і мець праблемы з законам — чуткі пра «сусветную амністыю піратаў» не спраўдзіліся, а ў Беларусі тым часам упершыню выпісаны штраф за пірацкую Windows.
Цяпер чытаюць
У Пскове расіянін забіў беларуса Валерыя за тое, што той патрабаваў паважаць беларускую нацыю9
Каментары