Стопрацэнтная яўка - ужо а 10.40 раніцы. Такая выбарчая актыўнасць на прэзідэнцкіх выбарах была зафіксавана сёння на закрытым участку № 16 у другім сталічным радзільным доме на вуліцы Бельскага. Да поўдня тут былі падлічаны бюлетэні і падведзены вынікі.
Датэрміновага галасавання ў бальніцы не было. Пацыенты другога радзільні маглі зрабіць свой выбар толькі 11 кастрычніка.
У калідоры на другім паверсе быў арганізаваны стацыянарны ўчастак. Але за тры з паловай гадзіны галасавання на яго ніхто так і не прыйшоў. Чатыры назіральнікі ад праўладных грамадскіх арганізацый і партый увесь гэты час проста назіралі, як камісія сядзіць за сталом.
Будучыя мамы маглі прагаласаваць і не выходзячы з палаты: па бальніцы пусцілі пераносную скрыню. Так і зрабілі ўсе 182 мясцовыя выбаршчыкі. тых, хто ўстрымаўся, не было.
У выбарчы абыход па радзільні выправілася два сябры камісіі і адзін назіральнік ад прафсаюза медыцынскіх работнікаў. Іншых кантралёраў і прэсу ў палаты не пусцілі. Старшыня і па сумяшчальніцтве намеснік галоўнага лекара радзільні № 2 Сяргей Васільеў растлумачыў гэта клопатам пра здароўе сваіх пацыентаў і санітарнымі патрабаваннямі. Таму даведацца, якую будучыню выбіраюць для сваіх дзяцей маладыя мамы, аказалася немагчыма.
Ужо да 10.40 раніцы галасаванне на закрытым участку завяршылася. На вачах ва ўсіх пяці назіральнікаў члены камісіі выявілі скрыню і пачалі падлік бюлетэняў.
Лідэрам тут стаў Аляксандр Лукашэнка. За яго паставілі «галачку» 119 выбаршчыкаў (65,7%). На другім месцы - Таццяна Караткевіч. За яе аддалі свой голас 28 будучых мам (15,5%). Сяргей Гайдукевіч з вынікаў у 8 галасоў (4,4%) апынуўся на трэцім месцы. Кандыдатуру Мікалая Улаховіча падтрымалі ўсяго 2 выбаршчыка (1,1%). Супраць усіх прагаласавала 24 чалавекі (13,3%). Адзін бюлетэнь прызнаны несапраўдным: выбаршчык паставіў адзнаку адразу насупраць двух прэтэндэнтаў на пасаду кіраўніка дзяржавы.
У назіральнікаў прэтэнзій да хады галасавання не было.
Цяпер чытаюць
Памерла Святлана Курс. У яе творах спалучаліся магія жывога жыцця і бязлітасны псіхалагізм. А ў публічных выступах і ФБ — рэзкі антыімперыялізм і элегантны лірызм13
Каментары