Пяцёра беларускіх апазіцыйных лідараў звярнуліся да ЕС з просьбай перазагрузіць ўнутраныя перамовы аб дэмакратычных рэформах у Беларусі, паведамляе Euobserver.
Як гаворыцца ў адкрытым лісце да кіраўнікоў інстытутаў ЕС, блок павінен выкарыстаць свой уплыў на Аляксандра Лукашэнку, каб перазагрузіць Круглы стол паміж уладай і апазіцыяй, закансерваваны ў 1999 годзе.
Палітыкі лічаць, што «перамоўны працэс», які павінен уключаць пасрэднікаў ад АБСЕ і ад органаў ЕС, можа «пашырыць прастору свабоды» для рэфармістаў.
Яны таксама заклікалі ЕС патрабаваць лепшых стандартаў у Беларусі падчас парламенцкіх выбараў у наступным годзе, напрыклад, шляхам прыняцця апазіцыянераў у выбарчыя камісіі і забеспячэння «адкрытага і празрыстага» падліку галасоў.
Ліст з'явіўся ў пятніцу, пасля таго, як ЕС прыпыніў на чатыры месяцы санкцыі супраць Лукашэнкі і яго атачэння.
Зварот падпісалі Сяргей Калякін, Анатоль Лябедзька, Уладзімір Някляеў, Павел Севярынец і Мікалай Статкевіч. Таццяна Караткевіч і Аляксандр Мілінкевіч падпісваць зварот адмовіліся. Апошні, паводле яго слоў, з-за таго, што «пакінуў палітыку».
У 1999 годзе пры дапамозе кансультацыйна-назіральнай місіі АБСЕ пад кіраваннем Ханса Георга Віка была спроба наладзіць дыялог паміж афіцыйным Мінскам і беларускай апазіцыяй. Мэтай перамоў павінен быў стаць рэгулярны доступ апазіцыйных партый да сродкаў масавай інфармацыі, дэмакратычныя рэформы парламента, сапраўды свабодныя і справядлівыя выбары, спыненне пераследу палітычных апанентаў на аснове Крымінальнага кодэкса і адміністрацыйнага судаводства. Аднак гэтая спроба пацярпела фіяска.
Цяпер чытаюць
«Знік без звестак» вельмі малады беларускі наёмнік5
«Знік без звестак» вельмі малады беларускі наёмнік
На Афоне адшукалі тры невядомыя раней асобнікі Астрожскай Бібліі. Для яе стварэння друкар Іван Фёдараў, выхадзец з Беларусі, выкарыстоўваў тэксты Скарыны66
Каментары