Мэр Нью‑Ёрку павіншаваў беларусаў з Днём Волі

Мэр Нью‑Ёрку Майкл Блумбэрг зьвярнуўся да беларускай дыяспары з нагоды 90‑х угодкаў БНР.

«Больш за стагодзьдзе Нью‑Ёрк зьяўляецца цэнтрам беларускай культуры ў Злучаных Штатах і месцам, дзе беларусы рэалізоўвалі свае мары цераз цяжкую працу, самаадданасць і аб’яднаны дух», — гаворыцца ў звароце Майкла Блумбэрга, дасланым Беларуска‑амэрыканскага задзіночаньню. ‑‑ Сёньня мы ўшаноўваем гэтых смелых людзей, чыя адданасьць справе свабоды служыць натхненьнем для ўсіх нас… Беларуска‑амэрыканскае задзіночаньне сьвяткуе 90‑ю гадавіну Беларускай Незалежнасьці ад Расейскай імпэрыі. Свабода была трагічна кароткай, але моцнае жаданьне гэтай арганізацыі на свабоднае волевыяўленьне да гэтага часу рухае яе агульным духам; усе жыхары Нью‑Ёрку горача чакаюць дня, калі беларусы будуць жыць дэмакратычна, у міры і дабрабыце».

Зварот мэра Ню‑Ёрку заканчваецца словамі: «Я, Майкл Блумбэрг, мэр Нью‑Ёрку, у прызнаньне гэтай важнай гадавіны БНР, аб’яўляю аўторак 25‑га сакавіка 2008 году ў горадзе Нью‑Ёрку Днём Беларускай Незалежнасьці», ‑‑ цытуе словы Майкла Блумбэрга Радыё Свабода.

***

У звароце мэра няма нічога надзвычайнага. Беларускі дзень незалежнасьці абвяшчаецца ў некаторых амэрыканскіх гарадах і штатах, ад пачатку 1960‑х.

Гэта стала магчыма дзякуючы працы дзьвюх найбуйнейшых этнічных арганізацый у гэтай краіне: Беларуска‑амэрыканскага задзіночаньня і Беларускага кангрэсавага камітэта, а таксама Акту аб паняволеных народах, прынятым кангрэсам ЗША ў 1959 г., у пераліку якіх былі ўключаныя таксама ўкраінцы і беларусы, нягледзячы на супраціў у ЗША расейскага лобі. Адпаведна ўлады на штатным узроўні атрымалі права выдаваць праклямацыі — г.зн. абвяшчаць дзень 25 Сакавіка Беларускім днём.

Тэкст праклямацый складаецца на падставе матэрыялаў, пададзеных самімі беларусамі.

Ад пачатку 1960‑х беларускі дзень абвяшчаўся ў горадзе і штаце Нью‑Ёрк, у штатах Нью‑Джэрзі і Агаё, у гарадах Саўт‑Рывэр, Нью‑Брансьвік (Нью‑Джэрзі), Кліўленд (Агаё), Пуэбла (Каларада), Лос‑Анджэлес ды інш. -- гарадах і штатах, дзе дзейнічалі найбольшыя беларускія суполкі.

Традыцыйна ў гэты дзень перад будынкам мэрыі пэўнага гораду уздымаецца беларускі сьцяг, а прадстаўнікі гарадзкіх уладаў, а ў маленькіх гарадах самі мэры бяруць актыўны ўдзел у сьвяточных мерапрыемствах ладжаных беларусамі.

Традыцыя абвяшчэньня беларускага дня дажыла да нашага дня ў Саўт‑Рывэры. Адзначаўся Беларускі дзень і ў канадзкім Таронта.

• 0
• 0
• 0
• 0
• 0
• 0
• 0
• 0