Інфанціна: ЧС-2026 — найлепшы ў гісторыі. Ва ўсім свеце пануе шчасце
«Фінал будзе падобны да сапраўднага феерверку. Гэта будзе нешта неверагоднае», — сказаў прэзідэнт ФІФА
Прэзідэнт ФІФА Джані Інфанціна назваў чэмпіянат свету 2026 года найлепшым турнірам у гісторыі, піша sports.ru.
«Фінал будзе падобны да сапраўднага феерверку. Гэта будзе нешта неверагоднае. Свет нібы спыніцца, і тры мільярды чалавек убачаць, чым завершыцца гэты чэмпіянат свету.
Чэмпіянат свету атрымліваецца сапраўды цудоўным, унікальным і неверагодным. Тут гуляюць найлепшыя футбалісты, найлепшыя зборныя, стадыёны запоўненыя, а ўсюды пануе сапраўднае свята.
Свет спыняецца і глядзіць. Гэта найлепшы чэмпіянат свету ў гісторыі — калі ўлічваць і мінулае, і сучаснасць. Акрамя таго, ён рыхтуе нас да будучыні. Я ўяўляў, што турнір будзе маштабным, але не настолькі. Не такога размаху, не з такой атмасферай, святам і энергіяй.
Ва ўсім свеце пануе шчасце. Вядома, калі ты прайграеш, табе сумна, але людзі прыехалі з усіх куткоў планеты, каб святкаваць футбол. У нас не было інцыдэнтаў. Сюды прыехалі людзі з усяго свету, і ўсе яны святкуюць футбол.
На турніры згулялі ўсе чэмпіёны, але з'явіліся і новыя каманды, і новыя краіны. Мы ўбачылі гісторыі, якія здольны напісаць і ператварыць у легенду толькі футбол», — сказаў Інфанціна.
Сёння апоўначы па беларускім часе адбудзецца матч за 3‑е месца паміж Англіяй і Францыяй.
Заўтра а 22‑й гадзіне ў Іст-Рутэрфордзе фінал Іспанія — Аргенціна.
Сёлета ўпершыню ў чэмпіянаце свету па футболе ўзялі ўдзел 48 камандаў. З 1982 па 1994 год удзельнічалі 24 зборныя, а з 1998 года — 32 зборныя.
Але Інфанціна заявіў, што, магчыма, у будучыні ў чэмпіянаце свету будуць удзельнічаць 64 зборныя (зараз ФІФА налічвае 211 зборных).
Каментары