Беларусь і "Лукойл" плануюць пашырыць супрацоўніцтва і рэалізаваць новыя буйныя сумесныя праекты. Канкрэтныя інвестыцыйныя планы абмеркаваў 28 сакавіка Аляксандр Лукашэнка з прэзідэнтам ААТ "Нафтавая кампанія "Лукойл" Вагітам Алекперавым.
"Лукойл" з'яўляецца самай буйной прыватнай нафтагазавай кампаніяй у свеце па памеры даказаных запасаў вуглевадародаў. Яна адыгрывае ключавую ролю ў энергетычным сектары Расіі, на яе долю прыпадае амаль 19 працэнтаў агульнарасійскай здабычы нафты і 18 працэнтаў агульнарасійскай перапрацоўкі чорнага золата. Асноўным рэгіёнам нафтаздабычы кампаніі з'яўляецца Заходняя Сібір. "Лукойл" таксама рэалізуе праекты па разведцы і здабычы нафты і газу за межамі Расіі - у Казахстане, Азербайджане, Узбекістане, Егіпце, Саудаўскай Аравіі, Іране, Калумбіі, Венесуэле, Іраку, Кот-д'Івуары.
Аляксандр Лукашэнка даў пазітыўную ацэнку цяперашняму ўзаемадзеянню Беларусі з "Лукойлам". "Мы без праблем развіваем узаемаадносіны, і нашы дамоўленасці выконваюцца. Тым не менш, наша сустрэча павінна высветліць некаторыя пытанні па існуючых дамоўленасцях", - адзначыў кіраўнік дзяржавы ў размове з Вагітам Алекперавым.
"Мы і далей будзем развіваць супрацоўніцтва, арыентуючыся на вашу кампанію, тым больш што "Лукойл" пачаў займацца і прыродным газам. Мы гатовы папрацаваць у гэтым напрамку", - дадаў Аляксандр Лукашэнка.
Вагіт Алекпераў асабліва падкрэсліў, што лічыць Беларусь прывабным рынкам, дзе створаны інвестыцыйныя асновы для ўкладання капіталу. Ён праінфармаваў аб тым, што дзеючае ў Беларусі сумеснае прадпрыемства па вытворчасці прысадак за тры гады амаль у 10 разоў павялічыла аб'ём вытворчасці і змагло выйсці на рынкі не толькі Беларусі і Расіі, але і трэціх краін.
"За мінулы год кампанія ўвайшла ў пяцёрку самых буйных падаткаплацельшчыкаў у рэспубліцы. Пачатыя праекты паспяхова развіваюцца, - падкрэсліў Вагіт Алекпераў. - Спадзяёмся, што нашы далейшыя ініцыятывы, адносна якіх мы хочам з вамі параіцца, знойдуць падтрымку і будуць рэалізаваны".
Паводле яго слоў, падрыхтаваны ўжо і разглядаюцца буйныя праекты, якія запатрабуюць значных капіталаўкладанняў. "Мы лічым, што Беларусь - гэта адзін з найбуйнейшых транзітных і перспектыўных рынкаў, таму кампанія прадаўжае далейшае развіццё сваёй дзейнасці на тэрыторыі рэспублікі", - заявіў Вагіт Алекпераў.
У прыватнасці, "Лукойл" прапанаваў даручыць дзеючаму сумеснаму прадпрыемству ў Наваполацку, што створана на парытэтных пачатках з беларускімі партнёрамі і займаецца вытворчасцю прысадак, выпуск і рэалізацыю змазачных матэрыялаў.
А. Лукашэнка адобрыў стварэнне адпаведнай рабочай групы для падрыхтоўкі тэхніка-эканамічнага абгрунтавання гэтага праекта.
"Лукойл" таксама мае намер інвесціраваць у стварэнне дадатковых аўтазаправачных станцый у рэспубліцы.
Каментары