Унікальны матэрыял для вырабу чыгуначных рэек стварылі беларускія навукоўцы
Беларускія навукоўцы стварылі новы, які не мае аналагаў у свеце, канструкцыйны матэрыял пад назвай Monicu, з якога метадам ліцця можна вырабляць чыгуначныя рэйкі, паведамілі ў Беларускім універсітэце транспарту.
Па словах прафесара універсітэта Леаніда Сасноўскага — аднаго з аўтараў вынаходкі, новы матэрыял па сваіх тэхнічных характарыстыках займае сярэдняе становішча паміж чыгуном і сталлю. Яго назва ўтвораная ад пачатковых літар трох хімічных элементаў: малібдэну, нікелю і медзі. Менавіта гэтыя металы, якія выкарыстоўваюцца ў пэўнай прапорцыі ў якасці дадаткаў у працэсе плаўкі чыгуну, надаюць матэрыялу асаблівыя ўласцівасці: трываласць сталі, высокія тэхналагічныя і службовыя ўласцівасці, як высокатрывалага чыгуну (два ў адным).
Як вядома, на працягу ўжо больш за 100 гадоў ва ўсім свеце вырабляюць толькі сталёвыя рэйкі. У працэсе эксплуатацыі яны зношваюцца і руйнуюцца. Штогод на іх замену выдаткоўваюцца велізарныя сродкі. Напрыклад, 1 км сталёвых рэек у аднанітачным вымярэнні каштуе прыкладна $65 тыс.
Навукоўцы сцвярджаюць, што калі рэйкі рабіць з Monicu, то іх кошт знізіцца ўдвая. Ліццё — больш простая і танная тэхналогія ў параўнанні з пракатам сталёвых аналагаў. Пры пераходзе на ліццё выдаткі толькі на электраэнергію памяншаюцца на 50%.
Былі вырабленыя чатыры эксперыментальных рэйкі Monicu. Праведзеная іх эксплуатацыя на шляхах арганізаванага руху цягнікоў Гомельскай дыстанцыі на працягу 16 месяцаў (усе сезоны года). Затым рэйкі знялі і абследавалі. Вынікі паказалі, што эксплуатацыйная стойкасць у новых рэек прыкладна такая ж, як у сталёвых.
Вынаходніцтва беларускіх навукоўцаў прааналізавана на пасяджэнні галоўных інжынераў чыгуначных адміністрацый дзяржаў Еўразійскага эканамічнай саюза, якое нядаўна прайшло ў Гомелі. Спецыялісты аднадушна падтрымалі праект і рэкамендавалі правесці далейшыя выпрабаванні рэек з Monicu з мэтай забеспячэння бяспекі руху.
Зараз рыхтуецца беларуска-расійская сустрэча на высокім узроўні, у ходзе якой павінен быць выпрацаваны план па арганізацыі вытворчасці літых рэек. У цяперашні час разгорнутая даўжыня чыгуначных шляхоў Расіі і Беларусі складае больш за 150 тыс. км. Акрамя таго, маецца яшчэ 100 тыс. км пад'язных шляхоў да прамысловых прадпрыемстваў. Патэнцыял рэйкавага рынку Саюзнай дзяржавы ацэньваецца ў 1 млн т у год.
Каментары