Прадпрымальнікі адмянілі мітынг, які быў запланаваны на 15 лютага
Сёння стала вядома, што грамадскае аб’яднанне «Перспектыва» адклікала заяўку на правядзенне вулічнай акцыі 15 лютага. Пра гэта «НН» паведаміў старшыня «Перспектывы» Анатоль Шумчанка.
«Нашай мэтай было, каб нас пачулі. Мы дабіліся перамоваў у Міністэрстве эканомікі, патрэба ў мітынгу адпадае», — сказаў Шумчанка. Рабочая група пры Міністэрстве эканомікі пачала працаваць 8 лютага.
Адметна, што сёння Аляксандр Лукашэнка моцна раскрытыкаваў ІПшнікаў. «І не глядзіце на забастоўкі нейкіх іпэшнікаў ці яшчэ кагосьці. Мы дакладна дамовіліся летась! Мы не пацаны, каб нас вадзіць за нос, тым больш мяне. Мы дамовіліся — у гэтым ключы трэба дзейнічаць», — сказаў Лукашэнка.
«Трэба разумець, што тыя, хто завозяць сюды рознага роду рыззё, і нават добрай якасці, калі б гэта было з Турцыі, Кітая, Расіі, і іншае — трэба разумець: усё, што мы завезлі да сябе адтуль, мы настолькі ж загубілі сваю эканоміку, лёгкую прамысловасць. Не будзе яна развівацца. Тым больш без дакументаў, без сертыфікатаў. Слухайце! Гэта ж мы ўзаконьваем бандытызм, злачынцаў! Адных ловім, саджаем, а іншым дазваляем», — лічыць Аляксандр Лукашэнка.
Анатоль Шумчанка глядзіць на гэтыя словы дастаткова спакойна. «Ну сказаў. Ну і што? Трэба звыкнуцца, што гаворыцца ў нас вельмі шмат усяго».
Індывідуальныя прадпрымальнікі патрабуюць ад уладаў адмены ўказа №222 аб абавязковай сертыфікацыі тавараў. Многія ІП пасля новага года не выйшлі на працу. 15 лютага на плошчы Бангалор у Мінск павінен быў прайсці мітынг камерсантаў.
Унікальныя здымкі будаўніцтва Старога моста ў Гродне. Хто фатаграфаваў небяспечныя кесоны, у якіх людзі рызыкавалі на дне Нёмана, каб паставіць апоры? ШМАТ ФОТА77
Каментары