Экс-кандыдаты ў прэзідэнты Беларусі Рыгор Кастусёў і Алесь Міхалевіч абвінавацілі старшыню Савета Федэрацыі Федэральнага сходу Расіі Валянціну Мацвіенка ва ўмяшанні ва ўнутраныя справы Беларусі. Пра гэта гаворыцца ў лісце, накіраваным палітыкамі старшыні верхняй палаты расійскага парламента.
Паводле паведамленняў СМІ, 7 чэрвеня падчас правядзення Форуму рэгіёнаў у Мінску Валянціна Мацвіенка назвала ініцыятыву ЕС «Усходняе партнёрства» бескарыснай у практычным плане. «Што тычыцца таго, каб паставіць паміж Беларуссю і Расіяй пасярэднікам так званае Усходняе партнёрства, то асабіста я лічу, што гэта ініцыятыва, нягледзячы на дэклараваны яе арганізатарамі мадэрнізацыйны характар, на самай справе існуе для аднаго — каб краіны, якія ў яе ўцягваліся, прывязваліся да эканамічнага, палітычнага ўплыву Захаду. Ніякай практычнай карысці яе ўдзельнікі не атрымалі», — адзначала Мацвіенка.
Беларускія апазіцыйныя палітыкі разглядаюць такія словы Мацвіенка аб Усходнім партнёрстве і яе ж ініцыятыву аб увядзенні агульнай візы Саюзнай дзяржавы як чарговую спробу ўмяшання ва ўнутраную і знешнюю палітыку Беларусі і навязванне «інтэграцыйных» працэсаў толькі ў інтарэсах Расіі.
«Як сведчыць статыстыка, усе інтэграцыйныя саюзы і аб'яднанні, створаныя па ініцыятыве РФ на постсавецкай прасторы, ужо прывялі да страты нейкай часткі незалежнасці і суверэнітэту нашай дзяржавы і зніжэння ўзроўню жыцця насельніцтва. Прапанаваны вамі фармат яшчэ больш цеснай інтэграцыі Беларусі ў Расійскую Федэрацыю прывядзе да поўнай страты незалежнасці нашай краіны і далейшага падзення ўзроўню жыцця грамадзян», — сцвярджаецца ў звароце.
Абодва палітыкі запатрабавалі ад Валянціны Мацвіенка змяніць яе падыходы і падыходы ўсяго кіраўніцтва Расіі да пытанняў наладжвання ўзаемаадносін РФ і Беларусі.
«Узаемаадносіны нашых краін павінны будавацца на ўзаемавыгадным супрацоўніцтве з карысцю для грамадзян абедзвюх дзяржаў. У адваротным выпадку, калі ў вас адсутнічаюць прапановы і ідэі, якія могуць паспрыяць вываду эканомік абедзвюх дзяржаў з зацяжнога крызісу і павышэнню ўзроўню жыцця насельніцтва, мы патрабуем ад вас спыніць усялякія выказванні і прапановы па пытаннях расійска-беларускай інтэграцыі», — гаворыцца ў звароце, накіраваным у Савет Федэрацыі РФ.
Цяпер чытаюць
Беларускія шпіёны пад дыпламатычным прыкрыццём у ЗША і краінах Еўропы. Хто яны? Поўны спіс5
Каментары