Супрацоўнікі Canon дапамаглі вырабіць веер з беларускімі літарамі для першакласнікаў
З рускімі літарамі веераў хоць заваліся, а дзе знайсці хоць адзін з беларускімі?
Праблема не новая, але чамусьці дагэтуль не вырашаная. Кожны год, як толькі бацькам трэба рыхтаваць дзіця да школы, абвастраецца зноў.
Мінчанка Мілана Міхалевіч звярнулася з гэтым пытаннем у Міністэрства адукацыі. У накіраваным звароце яна прасіла паведаміць, дзе можна набыць вееры, якія ўваходзяць у спіс неабходных рэчаў для вучняў першых класаў. Гэты пералік зацвярджае менавіта Міністэрства адукацыі. А таксама распавесці, што было зроблена і што плануецца зрабіць сёлета для вырашэння гэтай праблемы.
Адказ яна атрымала, але адказу на пытанне ў ім няма.
«За дзяржаўныя сродкі выдаюцца асноўныя кампаненты вучэбна-метадычных комплексаў — падручнікі, вучэбныя дапаможнікі, вучэбна-метадычная літаратура па вучэбных прадметах і іншыя сродкі навучання, якія з’яўляюцца абавязковымі пры арганізацыі адукацыйнага працэсу ва ўстановах агульнай сярэдняй адукацыі.
Веер галосных і зычных літар з’яўляецца адным з дадатковых сродкаў навучання, галоўная мэта выкарыстання якога ў адукацыйным працэсе — атрыманне настаўнікам зваротнай сувязі ад вучняў. Таму наяўнасць веера галосных і зычных літар у кожнага вучня першага класа не з’яўляецца абавязковай. Выпуск неабавязковых сродкаў навучання ажыццяўляецца прыватнымі прадпрыемствамі за пазабюджэтныя сродкі. Дадзеныя прадпрыемствы самастойна вызначаюць прыярытэты выпуску сродкаў навучання», — паведаміла ў адказе намеснік Міністра адукацыі Раіса Сідарэнка.
Мілана апісала гэтую сітуацыю ў фэйсбуку, і хутка знайшліся ахвотныя дапамагчы.
«Нам зрабілі вееры ў друкавальным цэнтры Canon. Супрацоўнікі цэнтру самі прапанавалі зрабіць. Выйшла не даражэй, чым вееры з рускімі літарамі з крамы, нягледзячы на маленькі аб’ём замовы, — 1,5 рубля, — распавяла Мілана Міхалевіч. — Я чакала, што будзе страшна дорага, бо многія апраўдваюцца гэтым: маўляў, нявыгадна вырабляць беларускамоўныя, не акупляюцца».
Але вееры – не адзіны дапаможнік, які складана адшукаць беларускамоўным вучням. Аналагічная сітуацыя з контурнымі картамі і атласамі па геаграфіі, нотнымі сшыткамі, табліцамі Мендзялеева і іншым.
Цяпер чытаюць
Памілаваны 15 палітвязняў, у тым ліку дзве сямейныя пары2
Каментары