6 кастрычніка Вярхоўная Рада можа прагаласаваць за візавы рэжым з Расіяй
У Вярхоўнай Радзе Украіны большасць дэпутатаў можа прагаласаваць за ўвядзенне візавага рэжыму з Расіяй, заявіў спікер парламента Андрэй Парубій у эфіры тэлеканала ICTV.
«Ёсць падставы выйсці на выніковае галасаванне … Ёсць падставы ў Вярхоўнай Радзе знайсці большасць», — заявіў Парубій.
Паводле яго слоў, па гэтым пытанні ён правядзе кансультацыі з лідарамі фракцый, пасля чаго ў чацвер, 6 кастрычніка парламент можа разгледзець праект пастановы аб увядзенні візавага рэжыму з Расіяй.
У панядзелак на Пагаджальнай нарадзе спікер Андрэй Парубій выступіў з ініцыятывай увесці візавы рэжым з Расіяй, у тым ліку ў адказ на арышт украінскага журналіста Рамана Сушчанкі ў Маскве.
Праект пастановы аб увядзенні візавага рэжыму з Расіяй ужо стаіць у парадку дня парламента на 6 кастрычніка.
Дакумент прадугледжвае звярнуцца да ўрада з патрабаваннем спыніць дзеянне Пагаднення паміж урадамі Украіны і РФ аб бязвізавых паездках грамадзян абедзвюх краін ад 1997 года.
Цяпер грамадзяне Расіі могуць падарожнічаць ва Украіну па замежным пашпарце.
Каментары