Актывісту з Рудзенска Уладзіміру Кандрусю бацькі перадалі ў ізалятар на вуліцы Валадарскага зімовы абутак і прадукты, але сустрэцца з сынам ім не дазволілі, распавяла «Свабодзе» сястра палітвязьня Ірына
16 лістапада ў Мінску распачалі працэс над Уладзімірам Кандрусем. Кондруся — удзельніка Плошчы-2010, якога затрымалі праз 5 гадоў — судзяць за ўдзел у масавых беспарадках. Яму пагражае да 8 гадоў пазбаўлення волі.
Уладзімір Кондрусь спрабаваў ускрыць сабе вены ў зале суда
Пасля гэтага суд пастанавіў адправіць падсуднага на комплексную псіхолага-псіхіятрычную экспертызу.
«Учора бацькі пайшлі да Валодзі на «Валадарку», але сустрэцца з ім так і не дазволілі, — распавяла Ірына. — Аднак перадачу ўзялі. Яшчэ сказалі, што адваката да яго не пусцяць, пакуль не пройдзе экспертызу. Учора ён яшчэ быў на Валадарскага, чакаў, пакуль адвязуць на экспертызу ў Навінкі. Доктар «Валадаркі» выходзіў да бацькоў і казаў, што са здароўем у Валодзі нібыта нармальна: маўляў, так, засталіся сляды на руцэ, але да значнай траўмы не дайшло. Толькі я лічу, навошта псіхэкспертыза, калі чалавек зусім нармальны? Ён толькі пратэставаў супраць гэтага суда і ўтрымання пад вартай».
Бацькі Кондруся Уладзімір Расціслававіч і Галіна Васільеўна, якія мелі за ўвесь час толькі адно спатканне з сынам, яго так і не пабачылі. Іх выклікалі на суд 16 лістапада як сведкаў, таму яны сядзелі пад дзвярыма залі суда. А да выкліку сведкаў у працэсе справы так і не дайшло.
Па словах адваката Вадзіма Мушынскага, які абараняў Уладзіміра Кондруся ў судзе, працэс адновіцца не раней за другую палову снежня: «Сёння я з ім не сустракаўся і не спрабаваў, таму што ведаю дакладна: пакуль не пройдзе экспертызы, да яго не дапусцяць. Такі закон. Працэс адновіцца ў лепшым выпадку ў другой палове снежня: экспертыза комплексная, яму шмат чаго давядзецца перажыць».
Тым часам праваабаронцы і апазіцыйныя палітыкі абвясцілі збор сродкаў у дапамогу Уладзіміру Кандрусю.
Каментары