Міністр абароны Польшчы Антоні Мацярэвіч заявіў, што Войцех Ярузэльскі і Чэслаў Кішчак будуць пазбаўленыя генеральскага звання, піша Радыё Польшча.
У 35-ю гадавіну ўвядзення ваеннага становішча ў Польшчы міністр нацыянальнай абароны Антоні Мацярэвіч сказаў, што ваеннае становішча можна параўнаць з першымі гадамі савецкай акупацыі Польшчы:
«Ваеннае становішча варта разглядаць як апошнюю спробу камуністычных уладаў зламаць хрыбет польскаму народу шляхам рэпрэсій, нябачаных у Еўропе з часоў сталінізму. А наступствы ваеннага становішча ў выніку здрады часткі апазіцыйных колаў адчуваюцца па сённяшні дзень».
Міністр Мацярэвіч паведаміў, што Войцех Ярузэльскі і Чэслаў Кішчак — былы міністр унутраных спраў Польшчы пры Ярузэльскім і адна з ключавых фігур рэжыму ваеннага становішча — будуць пазбаўленыя генеральскага звання, і што з гэтай мэтай ужо вядуцца заканадаўчыя працэдуры:
«Сёння апошні дзень, калі які-небудзь чыноўнік з Міністэрства нацыянальнай абароны можа вымавіць слова «генерал» з прозвішчам пана Ярузельскага. Мы робім крокі па пазбаўленні вайсковых званняў як у дачыненні да пана Ярузельскага, так і пана Кішчака. Злачынцы, на якіх ляжыць адказнасць за ўзброеныя дзеянні супраць уласнага народа, не заслугоўваюць вайсковых званняў».
Антоні Мацярэвіч падкрэсліў, што гаворка ідзе не пра разжалаванне ў радавыя, а менавіта пра пазбаўленне звання.
Працэдура пазбаўлення званняў Ярузельскага і Кішчака стане магчымай пасля ўвядзення паправак у закон, які рэгулюе прынцыпы усеагульнага вайсковага абавязку па абароне Рэспублікі Польшча.
Цяпер чытаюць
«Адгукнуўся на 95% аб'яў — і ўсе адмовілі». Расіяніну не хочуць здаваць кватэру ў Гродне12
Каментары