Каля 200 літоўскіх фур яшчэ застаюцца ў Беларусі. Магчыма, іх і не забяруць
Па словах кіраўніка асацыяцыі перавозчыкаў Linava Эрландаса Мікенаса, нават праз больш як два месяцы пасля таго, як беларускія ўлады дазволілі затрыманым на тэрыторыі Беларусі літоўскім фурам вярнуцца на радзіму, частка сродкаў транспарту — каля 200 штук, — усё яшчэ застаецца ў краіне, піша LRT.
Па словах Эрландаса Мікенаса, у Беларусі засталося не больш за 200 транспартных сродкаў, уключаючы як самі цягачы, так і паўпрычэпы. Аднак вялікая верагоднасць, што гэтыя грузавікі ўжо не вернуцца ў Літву.
Гэта звязана з тым, што іх вяртанне эканамічна нявыгаднае: плата за захоўванне вельмі высокая і ў некаторых выпадках перавышае кошт самога транспарту. Напрыклад, за адзін аўтапоезд трэба заплаціць каля 6 тысяч еўра. Таму некаторыя кампаніі адмаўляюцца ад сваіх машын, а іншыя яшчэ спрабуюць сабраць грошы, каб іх вярнуць.
Дадатковыя цяжкасці ўзнікаюць з-за санкцый: каб забраць транспарт, трэба зрабіць плацяжы беларускай кампаніі, якая знаходзіцца пад еўрапейскімі абмежаваннямі, і гэта можа лічыцца парушэннем санкцый.
Прадстаўнік літоўскай службы аховы мяжы паведаміў, што з канца сакавіка, калі з’явілася магчымасць вяртання, у Літву ўжо вярнулася да тысячы грузавікоў. Дакладную колькасць цяпер не вызначаюць, бо ў апошні час яны вярталіся вельмі павольна — усяго па некалькі машын у дзень.
Праблема з фурамі ўзнікла пасля таго, як у адказ на пастаянны запуск з Беларусі ў Літву кантрабандных паветраных шароў, якія перашкаджалі працы віленскага аэрапорта, літоўскія ўлады часова закрылі мяжу. Тады беларускі бок забараніў літоўскім грузавікам рухацца па сваёй тэрыторыі і прымусіў іх стаяць на спецыяльных стаянках, за якія цяпер патрабуецца аплата. Прытым не змяніў сваю пазіцыю нават даволі працяглы час пасля таго, як мяжа была адкрытая.
Што да цяперашняй сітуацыі на мяжы, то пункты пропуску працуюць нармальна і без перагрузкі. Праз іх штодня праязджае пэўная колькасць грузавікоў, але агульны паток зменшыўся. Чэргі значна скараціліся: калі раней кіроўцы маглі чакаць суткамі, то цяпер чаканне звычайна займае толькі некалькі гадзін, а часам чэргаў няма ўвогуле.
Перавозчыкі адзначаюць, што ўвогуле грузавыя патокі паміж Літвой і Беларуссю цяпер мінімальныя, бо значная частка перавозак перайшла на маршруты праз Польшчу.
Цяпер чытаюць
«Адгукнуўся на 95% аб'яў — і ўсе адмовілі». Расіяніну не хочуць здаваць кватэру ў Гродне8
Каментары