Ці праўда, што за кветнікі каля пад'езда цяпер будуць штрафаваць?
Міністр жыллёва-камунальнай гаспадаркі Генадзь Трубіла абверг чуткі пра тое, што ў Беларусі нібыта забаранілі рабіць кветнікі каля шматкватэрных дамоў. Па яго словах, такая інфармацыя не адпавядае рэчаіснасці.
Наадварот, як сцвярджае міністр, улады падтрымліваюць людзей, якія самастойна ўпрыгожваюць дваровыя тэрыторыі. Адзначаецца, што ўжо каля 7—8 тысяч двароў былі ўпарадкаваныя менавіта намаганнямі жыхароў.
Ніякіх штрафаў за стварэнне кветнікаў не прадугледжана, бо гэта лічыцца станоўчай ініцыятывай, якая робіць двор больш утульным і прыгожым.
Разам з тым ёсць пэўныя правілы, якіх трэба прытрымлівацца. Каб афіцыйна зрабіць кветнік, рэкамендуецца звярнуцца ў мясцовую службу ЖКГ і ўзгадніць свае планы, лепш нават з прыкладнай схемай пасадак. Гэта неабходна для бяспекі, бо пад зямлёй могуць праходзіць інжынерныя камунікацыі, і спецыялісты павінны праверыць гэта перад пачаткам работ.
Таксама варта памятаць, што даглядаць расліны павінны самі жыхары, якія іх пасадзілі. Акрамя таго, забараняецца выкарыстоўваць у кветніках самаробныя дэкарацыі, напрыклад, з аўтамабільных шын або пластыкавых бутэлек, а таксама высаджваць інвазійныя расліны і агародніну.
Каментары