Сёння і заўтра ў Мінску — паказы «Таямніцы Келза», шэдэўра анімацыі ў беларускай агучцы
Кінатэатр «Масква» (пр.Пераможцаў, 13). Прэм'ера — 17 сакавіка, 19:00. Наступныя паказы — 18 і 19 сакавіка, 17:00.
17—19 сакавіка ў кінатэатры «Масква» пройдуць паказы анімацыйнага фільма «Таямніца Келза», агучанага на беларускую мову. Гэта цудоўны спосаб адсвяткаваць дзень святога Патрыка і адчуць сапраўдны дух Ірландыі ў Мінску.
Мультфільм распавядае казачную гісторыю, заснаваную на падзеях ІХ стагоддзя ў Ірландыі. Галоўны герой, хлопчык Брэндан, жыве ў абацтве Келз. Неўзабаве ў абацтва прыбывае славуты асветнік Эйдан з таямнічай кнігай… У далейшых прыгодах будуць удзельнічаць не толькі яны, але і чароўная дзяўчынка Ашлінг з лесу, і кот Пангурбан.
Крытыкі па ўсім свеце з захапленнем сустрэлі «Таямніцу Келза». Стужка адзначана шэрагам узнагарод і намінаваная на «самы лепшы анімацыйны фільм» прэміі Оскар.
Дзякуючы найпрыгажэйшай графіцы, якую аглядальнік afisha.ru назваў «шэдэўрам дэкаратыўнай анімацыі», а таксама цікаваму і глыбокаму сюжэту, фільм спадабаецца як дзецям, так і дарослым.
Фільм агучаны на беларускую мову ў межах праекта «Беларускія ўікэнды»
пры падтрымцы «Атлант Тэлекам» і velcom. Частка агучаных у межах праекта фільмаў будзе даступная на сервісе інтэрактыўнага лічбавага тэлебачання «Атлант Тэлекам».
У агучцы ўдзельнічалі вядомыя акцёры: Павел Харланчук, Ганна Хітрык, Алесь Малчанаў, Святлана Цімохіна, Уладзімер Глотаў, Зміцер Саладуха.
Прэм’ера мультфільма адбудзецца 17 сакавіка а 19:00 у кінатэатры «Масква» (праспект Пераможцаў, 13).
Наступныя паказы адбудуцца 18 і 19 сакавіка а 17:00 таксама ў кінатэатры «Масква».
Каментары