Дзень Перамогі ў Магілёве: трыкалоры, георгіеўскія стужкі, партрэты Сталіна ФОТА
Міліцэйскі БТР, вэтэраны на УАЗах, партрэты Сталіна, воіны-аўганцы з георгіеўскімі стужкамі, вялізны сьцяг Савецкага Саюзу — з такім антуражам у Магілёве адбылося сьвяточнае шэсьце «Вялікая перамога шчасьлівага мая».
Шэсьце мала чым адрозьнівалася ад парадаў мінулых гадоў. Ад плошчы Леніна, на якой маршам прайшлі воінскія часьці магілёўскага гарнізону да плошчы Славы, калёну з вэтэранаў, чыноўнікаў, прадстаўнікоў працоўных калектываў віталі школьнікі, якіх вышыхтавалі ўздоўж Першамайскай вуліцы. Гукавое суправаджэньне было спрэс расейскамоўным.
У параўнаньні зь леташнім Днём перамогі паболела георгіеўскіх стужак. Незадоўга да фармаваньня калёны гэтую атрыбутыку арганізавана раздавалі воінам-аўганцам.
Стужкі ім прынесьлі ў цэляфанавым пакеце. Чыноўнікі ў калёне на лацканы пачапілі чырвона-зялёныя стужкі зь яблыневым цьветам. Некаторыя гараджане прыйшлі зь вялікімі сьцягамі Савецкага Саюзу і расейскімі трыкалёрамі.
«Высілкамі Расеі была дасягнутая перамога над фашызмам», — патлумачыў малады чалавек, чаму ён прыйшоў на парад з сьцягам суседняй краіны. Пытаньня пра ўласаўцаў і іхны ўдзел у Другой усясьветнай вайне малады чалавек не зразумеў.
Шэсьце скончылася на пляцы перад гарадзкой ратушай. Тут сабралася багата народу. Школьнікі, якія віталі шэсьце ўздоўж Першамайскай, разьбегліся, як толькі атрымалі на тое дазвол.
Неўзабаве за сьвяточным шэсьцем прайшла калёна сьмецяроў. Камунальнікі прыбіралі праезную частку Першамайскай ад ашмоцьця паветраных балёнікаў ды іншай атрыбутыкі.
Цяпер чытаюць
Зяленскі ў Вільні: Пакуль шпіц Лукашэнкі мае больш правоў, чым народ Беларусі20
Каментары