Проста падчас Алімпіяды ў адстаўку адпраўлены міністр спорту Аляксандр Шамко. Лукашэнка абвінаваціў яго і міністра лясной гаспадаркі Міхаіла Амельяновіча ў «непрыняцці антыкарупцыйных мераў» у сваіх ведамствах. «Наша Ніва» згадвае Аляксандра Шамко, які апошнія шэсць гадоў узначальваў спартовую сферу краіны.
З пажарных — у спартсмены
У Аляксандра Шамко вельмі незвычайная кар’ерная лінія. Але калі Лукашэнка сказаў «трэба», то Шамко адказаў «ёсць»!
Аляксандру Шамко 50 гадоў, ён мінчук. Скончыў політэхнічны тэхнікум, пасля чаго служыў у савецкім войску. Ад 1989 года Шамко ў сістэме МНС. Працаваў звычайным пажарным на вуліцы Сярова ў Мінску. Быў камандзірам аддзялення, начальнікам каравула. Карацей, прайшоў на пажарнай службе самыя розныя прыступкі.
У 2007-м яго прызначаюць начальнікам дзяржаўнага пажарнай аварыйна-выратавальнай установы «Рэспубліканскі атрад спецыяльнага прызначэння» МНС. А яшчэ праз год Шамко становіцца намеснікам міністра МНС.
Аднак у 2012 годзе Шамко атрымлівае надзвычай нечаканае прызначэнне — міністрам спорту. Ён тады прыйшоў у адной звязцы з Максімам Рыжанковым, які тады быў памочнікам прэзідэнта па пытаннях спорту, а цяпер з’яўляецца першым намеснікам кіраўніка Адміністрацыі прэзідэнта.
У міністра адсудзілі кватэру
Вясной 2014 года Аляксандр Шамко набыў сабе чатырохпакаёўку па вуліцы Янкоўскага ў Мінску. Усё ж не апошні чыноўнік у краіне, можа сабе і дазволіць. Але справа была ў тым, што кватэра дасталася міністру па цане, меншай за рынкавую. Справа ў тым, што забудоўшчык «Маналітград» меў праблемы, часта ўзвінчваў цэны. Многія дольшчыкі адмаўляліся даплочваць. Тады «Маналітград» разарваў дамовы ў аднабаковым парадку. А ў адну з чатырохпакаёвак і ўклаў грошы чыноўнік.
Квадратны метр каштаваў міністру $1134 у эквіваленце, і гэта была выгадная ўгода. Бо па Мінску сярэдняя цана тады складала $1650 за метр. Аднак сям’я, якая валодала першаснымі правамі на кватэру, падала ў суд на забудоўшчыка. Шамко змірыўся са стратай кватэры і не працягваў судовыя спрэчкі.
Шматлікія допінгавыя сканадалы
Чым запомнілася кіраванне Шамко беларускім спортам? Была самая ўдалая зімовая Алімпіяда ў Сочы, дзе дзякуючы бліскучаму выступу Дар’і Домрачавай (тры золата!), беларусы здабылі аж шэсць медалёў. А вось на летніх Алімпіядах нашы атлеты выступаюць усё горш.
У дашамкоўскую эпоху, на Алімпіядзе ў Пекіне беларусы былі 16-і ў агульным заліку. У Лондане — 26-і, а ў Рыа-дэ-Жанэйра — 40-і. У Бразіліі беларусы здабылі толькі дзевяць медалёў — гэта найгоршы вынікам за часамі незалежнасці.
Сваёй допінгавай праграмы беларусы, вядома, не маюць. Але нашы спартсмены з зайздроснай рэгулярнасцю трапляюцца на такіх скандалах. За апошнія гады былі дыскваліфікаваныя кідальнік молата Павел Крывіцкі, цяжкаатлет Станіслаў Чадовіч, штурхальніца ядра Наталля Міхневіч, цяжкаатлетка Настасся Новікава і многія іншыя.
Не адрамантаваў стадыён «Дынама»
Па словах Шамко, за рэканструкцыяй стадыёна «Дынама» ў Мінску ён назірае проста з вокнаў свайго працоўнага кабінета.
Стадыён «Дынама» закрылі на рэканструкцыю аж у 2012. Планавалася, што да лета наступнага года яго ўжо ўвядуць у эксплуатацыю. Аднак на дварэ ўжо 2018, а працы ўсё яшчэ не завершаныя. Такім чынам, цэлы двухмільённы горад застаўся без паўнавартаснага стадыёна, дзе, скажам, магла б гуляць нацыянальная зборная па футболе.
Нарэшце, здаць аб’ект плануюць пад ІІ Еўрапейскія гульні, якія пройдуць у Мінску ў 2019 годзе. Гэта дарагое спаборніцтва, ад яго адмовілася Галандыя, а вось Беларусь узялася.
Нядаўна, калі журналіст «Прессбола» спытаўся ў Шамко адносна казырка, які не да канца закрывае ўсіх гледачоў ад дажджу, то Шамко проста сарваўся на яго, маўляў, займаецца крытыканствам. Міністэрства спорту пры Аляксандру Шамко было адным з найбольш закрытых ведамстваў.
Хто можа прыйсці на змену?
Новы міністр пакуль не прызначаны. Самы час крыху пагадаць на кававай гушчы. Хто можа сесці ў міністэрскае крэсла? Некалькі гадоў назад успаміналася Наталля Пяткевіч, але малаверагодна, што былая топ-чыноўніца зараз зноў вернецца ў абойму. Застаецца першы намеснік кіраўніка Адміністрацыі прэзідэнта Максім Рыжанкоў, для якога спорт — гэта родная сфера. Можа быць, пара вярнуць у дзяржаўнае кіраванне былога кіраўніка Памежнага камітэта Ігара Рачкоўскага. А ёсць яшчэ дэпутат-малатабоец Вадзім Дзевятоўскі. Хаця міністрам спорту можа аказацца чалавек са сферы, зусім далёкай да спорту, сам Шамко гэта цудоўна даказаў.
Каментары