Выбарчая камісія Дэмакратычнай Рэспублікі Конга (былы Заір) абвясціла пераможцу прэзідэнцкіх выбараў - ім стаў лідар апазіцыі і кіраўнік партыі «Саюз за дэмакратыю і сацыяльны прагрэс» Фелікс Чысэкедзі, паведамляе Reuters.
Чысэкеддзі набраў 38,57% галасоў выбаршчыкаў. Чакаецца, што яго галоўны апанент Мартэн Фаюлу і іншыя кандыдаты ў найбліжэйшыя дні паспрабуюць аспрэчыць вынікі выбараў з-за парушэнняў.
Пасля гэтага Канстытуцыйны суд на працягу 10 дзён павінен будзе вынесці рашэнне. Калі суд прызнае перамогу Чысэкедзі, то ён стане першым лідарам краіны з часоў Патрыса Лумумбы, які прыйшоў да ўлады з дапамогай электаральнага працэсу, адзначае Reuters.
Дзейным прэзідэнтам ДР Конга з'яўляецца Жазэф Кабіла, які знаходзіцца ва ўладзе з пачатку 2001 года. У снежні 2016 г. паміж ім і апазіцыяй было дасягнута пагадненне, згодна з якім Кабіла паабяцаў пакінуць сваю пасаду да канца 2017 года. Аднак у лістападзе 2017 года выбарчая камісія адклала правядзенне прэзідэнцкіх выбараў, перанёсшы іх на снежань 2018 года.
Каментары