Камары ў ЗША пераносяць смяротны для чалавека вірус — сёлета ўжо ёсць дзве ахвяры
У Злучаных Штатах зарэгістравана ўжо больш за дзесятак выпадкаў заражэння вірусам усходняга энцэфаламіеліту коней EEE. Пераносчыкамі гэтай небяспечнай інфекцыі, якая прывяла ўжо да дзвюх смерцяў, з'яўляюцца камары, паведамляе Бі-бі-сі.
EEE, або ўсходні конскі энцэфаліт, як яшчэ называюць гэта рэдкае, але вельмі сур'ёзнае захворванне, можа нанесці істотны ўрон пагалоўю жывёлы, а ў выпадку заражэння людзей прыводзіць да незваротных парушэнняў у рабоце мозгу і часам да змены асобы, а нярэдка і смяротнага канца.
Вірус EEE невылечны, аднак у выпадку ранняй дыягностыкі, пакуль ён не дасягнуў мозга, паспяховае лячэнне магчыма. Траціна інфіцыраваных, як правіла, памірае праз некалькі тыдняў пасля заражэння ці праз некалькі гадоў з-за паражэння мозгу ці іншых фізіялагічных фактараў.
Часцей за ўсё камары-носьбіты віруса сустракаюцца ў паўночна-ўсходніх штатах у багністых і лясістых раёнах з позняй вясны па раннюю восень, а таксама і ў паўднёвых штатах зімой.
У гэтым годзе колькасць заражэнняў чалавека вірусам ЕЕЕ ўжо прыкметна перавысіла сярэднегадавыя 5—10.
У штаце Масачусетс, дзе ў пачатку жніўня быў адзначаны першы ў гэтым годзе ў ЗША выпадак, агулам заразілася 7 чалавек, адна жанчына памерла, пяцігадовая дзяўчынка застаецца ў крытычным стане. Прынамсі 3 чалавекі захварэлі ў Мічыгане, адзін памёр. Пад падазрэннем былі яшчэ 4 чалавекі. Але ў іх выпадку дыягназ не пацвердзіўся. У Нью-Джэрсі зарэгістраваны адзін выпадак заражэння сярод людзей і множныя заражэнні коней, якіх прыйшлося ўсыпіць. Адзін выпадак заражэння вірусам ЕЕЕ адзначаны ў Род-Айлендзе. У Індзіане паведамляюць пра захворванні коней. Прынамсі па адным выпадку заражэння коней вірусам ЕЕЕ зарэгістравана ў штаце Агаё і акрузе Ёрк штата Мэн. У штаце Нью-Ёрк вірусам зараджаны адзін конь і два камарыныя балоты ў раёне Сіракуз.
Каментары