Больш за $1,5 мільёна хабараў, 16 абвінавачаных. Суд пачынае разглядаць «справу Уцюрына»
У аўторак, 10 сакавіка, Вярхоўны суд пачынае разглядаць гучную «справу Уцюрына». Пасяджэнні будуць праходзіць у памяшканні суда Маскоўскага раёна. Тут размешчана адна з самых вялікіх залаў, якая можа змясціць больш за сотню чалавек. Абвінавачаным выстаўлены два артыкулы Крымінальнага кодэкса: арт. 430 (Атрыманне хабару) і арт. 431 (Дача хабару). Па крымінальнай справе толькі ў хабарнікаў канфіскавана больш за 1,65 мільёна даляраў, 62 тысячы еўра, больш за 1 кілаграм золата, піша Tut.by.
Пра тое, што ў намесніка Дзяржсакратара Рады Бяспекі Андрэя Уцюрына з'явіліся праблемы з законам, стала вядома ў красавіку 2019 года.
«Ён быў затрыманы з доказамі злачынства пры атрыманні 148 600 даляраў ЗША ад прадстаўніка расійскай камерцыйнай структуры «Г» за садзейнічанне ў прасоўванні яе інтарэсаў у Рэспубліцы Беларусь. Апошняму прад'яўлена абвінавачанне ў дачы хабару», — так пракаментавалі ў КДБ крымінальную справу.
Разам з Уцюрыным за кратамі апынуўся былы генеральны дырэктар «Белтэлекама» Сяргей Сівадзедаў. Па паведамленні КДБ, службовыя асобы бралі хабары за заключэнне дагавораў, якія прадугледжваюць у тым ліку мадэрнізацыю тэлекамунікацыйнага апаратна-праграмнага комплексу і пастаўку абаненцкіх прыставак з убудаваным модулем Wi-Fi; закупку ліцэнзій для тэлекамунікацыйнага абсталявання, праграмнага забеспячэння і абароны інфармацыі. Усяго па справе праходзіць 16 абвінавачаных, пяцёра з іх прызналі віну і заключылі здзелку са следствам.
Падчас папярэдняга слухання ў Вярхоўным судзе 12 лютага адвакат Андрэя Уцюрына прасіў закрыць працэс. Як перадаваў з залы суда «Sputnik Беларусь», абвінавачаны таксама звяртаўся ў суд з такой просьбай, паказваў, што ў матэрыялах справы ўтрымліваюцца сакрэтныя звесткі, якія адносяцца да часу яго службы ў Радзе бяспекі. Суд вырашыў разглядаць справу ў адкрытым рэжыме.
16 фігурантам залічыў два артыкулы Крымінальнага кодэкса: арт. 430 (Атрыманне хабару) і арт. 431 (Дача хабару). Канчатковая сума хабару Андрэя Уцюрына складае 190 тысяч даляраў. А старшыня праўлення ААТ «Беларускі міжбанкавы разліковы цэнтр» Фелікс Каспяровіч і намеснік начальніка Галоўнага ўпраўлення інфармацыйных тэхналогій Нацыянальнага банка Андрэй Падгорны абвінавачваюцца ў атрыманні хабараў ў агульнай суме не менш за 868 750 даляраў.
Некаторым службовым асобам пагражае да 15 гадоў пазбаўлення волі.
Каментары