У Маскве і Падмаскоўі ўлады загадалі пенсіянерам сядзець дома, забаранілі выхад на работу, выплацяць ім матэрыяльную дапамогу
Мэр Масквы Сяргей Сабянін і губернатар Маскоўскай вобласці паведамілі аб новых мерах па барацьбе з распаўсюджваннем каранавіруса. Так, у абодвух рэгіёнах абавязалі заставацца дома і выконваць рэжым самаізаляцыі з 26 сакавіка да 14 красавіка жыхароў, старэйшых за 65 гадоў, а таксама тых, хто мае хранічныя захворванні, перадае РБК.
Выходзіць на вуліцу пажылым людзям прапануецца толькі ў выпадку крайняй неабходнасці (у краму ці аптэку). У выпадку з Масквой Сабянін прапанаваў па магчымасці з'ехаць на дачу.
«Калі вы працуеце, прашу вас не хадзіць на працу», — адзначыў у сваім звароце Сабянін. Паводле яго слоў, абавязацельства выконваць хатні рэжым для пажылых людзей не тычыцца толькі кіраўнікоў і супрацоўнікаў, «чыё знаходжанне на працы жыццёва важна для функцыянавання прадпрыемстваў, арганізацый, устаноў і органаў дзяржаўнай улады, а таксама для работнікаў аховы здароўя». У іншым выпадку працадаўцы павінны даць магчымасць пажылым абохворым на хранічныя захворванні працаваць аддалена альбо даць ім аплачваны адпачынак або адправіць на бальнічны.
Улады паабяцалі грамадзянам, старэйшым за 65 гадоў, і хранічна хворым людзям разавую матэрыяльную дапамогу. У Маскве яна складзе ₽4000 (130 беларускіх рублёў) (₽2000 авансам і столькі ж пасля заканчэння хатняга рэжыму пры ўмове яго адказнага выканання).
У Маскоўскай вобласці матэрыяльная дапамога складзе ₽3000 (100 беларускіх рублёў) на такіх ужо умовах (₽1500 адразу і ₽1500 пасля 14 красавіка).
Паабяцалі ўлады і іншыя меры падтрымкі пераведзеных на хатні рэжым пажылых і хранічна хворых:
- у Маскве аператараў сувязі абавязалі не адключаць ім тэлефон і інтэрнэт пры нулявым ці адмоўным балансе
- не трэба пакідаць кватэру або з'язджаць з дачы, каб аплаціць квітанцыі па паслугах ЖКГ. Спагнанне пені і штрафаў за пратэрміноўку аплаты паслуг ЖКГ часова адмяняецца ў Маскве пажылым і хранічна хворым людзям
- паабяцалі дапамагчы з дастаўкай прадуктаў, лекаў і рашэннем іншых бытавых праблем
- для выкліку сацыяльных работнікаў і валанцёраў выдзяляецца асобны нумар тэлефона.
у Падмаскоўі дадатковыя меры падтрымкі атрымаюць і школьнікі, якія маюць права на бясплатнае харчаванне ў школах, а цяпер сядзяць дома. Ім будуць прадастаўляць прадуктовыя наборы.
Сабянін таксама папрасіў прадстаўнікоў маладога пакалення па магчымасці ўстрымацца ад асабістых зносін з бацькамі, бабулямі і дзядулямі і наогул пажылымі людзьмі.
«Нават не адчуваючы сімптомаў захворвання, вы можаце быць носьбітамі каранавіруса, які вельмі небяспечны для пажылых людзей», — гаворыцца ў звароце мэра Масквы.
Па афіцыйных дадзеных за апошнія суткі ў Маскве зарэгістраваны 71 новы выпадак заражэння каранавірусам. Агульная колькасць інфікаваных у сталіцы перавысіла 200 чалавек.
Каментары