Органы перасадзілі двум хлопчыкам, 10 і 11 гадоў. Донарамі выступілі іх жывыя сваякі.
Паводле звестак прэс‑службы Міністэрства аховы здароўя, аперацыі па трансплантацыі ныркі былі праведзены 6 і 7 красавіка ў рэспубліканскім цэнтры уралогіі і нефралогіі 2‑й дзіцячай клінічнай бальніцы Мінска.
Органы перасадзілі двум хлопчыкам, 10 і 11 гадоў, жыхарам Лунінецкага раёна Брэсцкай вобласці і Гродзенскага раёна. Донарамі выступілі іх жывыя сваякі: у адным выпадку 48‑гадовы бацька, у другім — 28‑гадовая маці.
Як паведамляе прэс‑служба, аперацыі па заборы донарскіх нырак прайшлі ў рэспубліканскім цэнтры нефралогіі 4‑й гарадской бальніцы, пасля чаго закансерваваныя органы былі перавезены ў 2‑ю дзіцячую бальніцу Мінска. Трансплантацыі выкананы брыгадай спецыялістаў, якая складаецца з трансплантолага, дзіцячых уролагаў, анестэзіёлагаў і нефролагаў.
Стан усіх пацыентаў «стабільны і адпавядае цяжкасці перанесеных аператыўных умяшанняў»,паведамляе прэс‑служба. Ныркавыя трансплантаты працуюць добра і выконваюць усе свае функцыі.
Паводле апошніх звестак Міністэрства аховы здароўя, у перасадцы ныркі ў Беларусі маюць патрэбу 24 дзіцяці, некаторыя дзеці знаходзяцца ў лісце чакання больш як пяць гадоў.
Толькі шэсць беларускіх дзяцей маюць дзейны трансплантат. Ныркава‑замяшчальную тэрапію атрымлівае 41 дзіця.
Колькасць перасадак нырак дарослым штогод узрастае: калі ў 1998 годзе ў краіне было зроблена 17 аперацый па перасадцы ныркі, то ў 2008‑м — 70. З пачатку гэтага года ўжо выканана 25 трансплантацый.
Цяпер чытаюць
«Ёсць у Беларусі людзі, якім не падабаецца расійскі сцяг, савецкі сцяг». Расіяніну на BMW Х7 з нямецкімі нумарамі пашкодзілі аўто ў Мінску16
Каментары