11‑гадовая дзяўчынка хацела ўратаваць бацькоў і схавала іх грошы за гаражамі
Ашуканцы патэлефанавалі мінскай школьніцы, прадставіліся супрацоўнікамі службы па абслугоўванні дамафонаў і пад выглядам замены абсталявання выманілі ў яе код з SMS-паведамлення.
Пасля з дзяўчынкай звязаўся ілжэсілавік, паведамляе «Міліцыя Мінска».
Ён запалохаў дзіця, заявіўшы, што яно міжволі кантактавала з ашуканцамі. Каб узмацніць ціск, суразмоўца паведаміў, што нібыта дадому прыйдуць з ператрусам, каб высветліць, ці не датычныя бацькі да дапамогі злачынцам.
Спалохаўшыся, школьніца сабрала ўсе сямейныя зберажэнні (24 тысячы рублёў у эквіваленце), паклала грошы ў пакет і пакінула яго ў загадзя ўзгодненым месцы за гаражным кааператывам.
Аператыўнікі затрымалі кур'ера, які забраў грошы. Ім быў 31‑гадовы мінчанін, які раней і сам стаў ахвярай махляроў: ён паверыў у гісторыю пра замену электралічыльнікаў, аформіў крэдыт на 65 тысяч рублёў і перадаў гэтыя грошы ашуканцам.
Пасля гэтага, выконваючы ўказанні сваіх «куратараў», мужчына забраў грошы ў падманутай дзяўчынкі і перадаў іх наступнаму пасрэдніку.
Каментары
[Зрэдагавана]