У сталіцы ўжо пачалі ставіць ёлкі, ствараць фотазоны і святочную ілюмінацыю. Як упрыгожаць вуліцы і плошчы горада да навагодніх святаў, паведамляюць «Мінск-Навіны».
Плошча Незалежнасці
Ёлка на плошчы Незалежнасці будзе ў бардова-залатой гаме. Яе ўпрыгожаць бусамі і вялікай колькасцю цацак. Тут жа з'явіцца фотазона ў выглядзе святочных падарункаў. На будынку БДПУ будзе пано з віншаваннем, распавяла начальніца аддзела дызайну прадпрыемства «Мінскрэклама» Таццяна Бугоркава.
Праспект Пераможцаў
Праспект Пераможцаў да свята аформяць у сініх, сярэбраных і фіялетавых танах. Яшчэ тут з'явіцца снегавік на высокай ледзяной глыбе.
Кастрычніцкая плошча
На Кастрычніцкай плошчы традыцыйна з'яўляецца галоўная ёлка сталіцы. Яна будзе з піксельнай падсветкай, як і ў мінулым годзе. На «вячэрнім макеце» «Мінскрэкламы» на экране — чырвона-зялёны сцяг. Але, відавочна, малюнак можа змяняцца.
Яшчэ на галоўнай ёлцы будзе шмат цацак.
На плошчы ўсталююць фоталакацыі ў выглядзе ледзяных груд, санак, светлавых арак.
Пляцоўкі каля Белдзяржцырка і «Чыжоўка-Арэны»
Незвычайную ёлку са светлавых шароў, якая стаяла ля Ратушы, цяпер усталююць каля Белдзяржцырка. Яшчэ там будзе дзіцячая фотазона ў выглядзе паравозіка.
Светлавыя шары, якія ў мінулым годзе ўпрыгожвалі Кастрычніцкую плошчу, усталююць на пляцоўцы перад «Чыжоўка-Арэнай». Туды ж пераедзе «спіральная» ёлка, якая раней стаяла ля Палаца спорту.
Цяпер чытаюць
У дакументах па «справе Эпштэйна» знайшлі сляды буйных грашовых пераводаў у Мінск. Зноў усплыло імя Карыны Шуляк11
Каментары