«Мы бачым актывізацыю рэпрэсій ў дачыненні да Касцёла»: біскуп Юрый Касабуцкі пракаментаваў прысуды святарам
Біскуп Мінска-Магілёўскай архідыяцэзіі Юрый Касабуцкі падтрымаў святароў, асуджаных на суткі адміністрацыйнага арышту. Пра гэта ён напісаў у сваім фэйсбуку.
«Мы бачым актывізацыю рэпрэсій у дачыненні да Каталіцкага Касцёла ў нашай краіне.
Мы адкрыта выступаем супраць кожнага граху, супраць насілля і гвалту, супраць хлусні і фальшу, супраць рэпрэсій, супраць ціску і запалохвання, супраць прыніжэння чалавечай годнасці, бо кожны чалавек створаны па вобразу і падабенству Божаму. Мы асаблівым чынам молімся аб супакоі, згодзе, салідарнасці і адзінстве беларускага народа.
Аднак усё гэта хтосьці лічыць праявай экстрэмізму, распальваннем варожасці і г. д.!» — напісаў ён.
Юрый Касабуцкі чарговы раз заклікаў да ўзмацнення малітвы за Бацькаўшчыну, беларускі народ, за людзей, якія знаходзяцца за кратамі па палітычных матывах, за тых, каго звальняюць з працы за іх погляды, за тых, каго запалохваюць і шантажуюць, за ўсіх церпячых і за тых, каму асабліва патрэбна наша малітоўная падтрымка.
«Прашу па меры магчымасці ў кожным касцёле, кожнай капліцы публічна маліцца за ксяндза Вячаслава Барка і айца Віталя Быстрова і тлумачыць людзям пра сапраўдныя прычыны трымання гэтых святароў у вязніцах (рэпрэсіі, ціск, запалохванне, пераслед Касцёла за праўду і г. д.)», — напісаў каталіцкі іерарх.
Нагадаем, што а. Вячаслаў Барок (пробашч касцёла ў Расонах) і а. Віталь Быстроў (грэка-каталіцкі святар з Івацэвічаў) атрымалі па 10 сутак арышту. В. Барок змясціў у сваім фэйсбуку плакат Уладзіміра Цэслера, які суд палічыў прапагандай нацысцкай сімволікі, а Віталь Быстроў быў асуджаны за «ўдзел у несанцыянаваным мерапрыемстве».
Цяпер чытаюць
Доктара сацыялагічных навук і супрацоўніцу Акадэміі навук асудзілі за «фінансаванне экстрэмізму»1
Доктара сацыялагічных навук і супрацоўніцу Акадэміі навук асудзілі за «фінансаванне экстрэмізму»
«Наіўна спадзяваліся зарабляць у Еўропах, прыязджаць дадому лячыць зубы на халяву і здаваць кватэру». Прапаганда пачала апраўдваць дарагія жыроўкі для «дармаедаў»2222
Каментары