На сустрэчы Церцеля на «Азоце» работнікі заапладзіравалі начальніку цэха, які цвёрда яму адказаў
Адзіныя апладысменты за час выступу кіраўніка Камітэта дзяржаўнай бяспекі Івана Церцеля на гродзенскім «Азоце» прагучалі, калі яму адказаў начальнік аднаго з цэхаў прадпрыемства.
Вось даслоўная стэнаграма гэтага моманту сустрэчы. Варта адзначыць, што гэта было першае пытанне з залы. Перад гэтым старшыня КДБ расказваў, як дзейнічае паліцыя ў ЗША і якія эканамічныя праблемы перажываюць краіны Еўропы.
«Начальнік цэха:
— У мяне некалькі пытанняў, але перад тым, як іх задаць, хачу пракаментаваць вашы словы.
Што тычыцца Польшчы, Германіі. Справа ў тым, што ў людзей, якія сядзяць у зале, шмат родзічаў, у каго дзеці, у каго іншыя, працуюць за мяжой. Мы з першых вуснаў ведаем, што там робіцца, таму я б не зусім з вамі пагадзіўся, што там чорт ведае што.
Што тычыцца Амерыкі, вы не забывайце, што там вольны продаж зброі, і там любы грамадзянін можа вольна яе набыць. Таму дзеянні паліцэйскага гэтым абгрунтаваныя, бо ў яго [каго амерыканскі паліцэйскі затрымлівае] ў кішэні можа пісталет ляжаць. У нас, прабачце, людзі без зброі.
Што ў вашым разуменні дэмакратыя такое, вось вы патлумачце, каб мы разумелі? Мы зразумелі адно: не высоўвайцеся, сядзіце, іначай вас «замочаць у сарціры». (Выбух апладысментаў.)
Адказ Івана Церцеля:
— Польшча займае такую пазіцыю ў дачыненні да Рэспублікі Беларусь — агрэсіўную, не разлічаную на блізкія інтарэсы. Яна не ацэньвае свае стратэгічныя інтарэсы на перспектыву. У Польшчы свае праблемы, пра якія я казаў. Вы адмаўляеце, што там па нядзелях адбываюцца маніфестацыі?
Людзі з залы, дзясяткі галасоў: Супраць абортаў!
Церцель: Шматтысячныя маніфестацыі супраць абортаў праходзяць…
Людзі з залы, дзясяткі галасоў: Не!
Церцель: …Ёсць нацыяналісты, ёсць незадаволеныя партыяй «Права і справядлівасць», перакрываецца дарожны рух…
Жанчына з залы: Ай-яй-яй, як страшна!
Церцель: Калі ласка! Што тычыцца ЗША: а што, Аўтуховіч не быў узброены?
Голас з залы: А дзе вы яго ўзялі ўвогуле? (Выбух смеху ў зале.)
Церцель: А што, выбух машыны супрацоўніка АМАПа каля дзіцячага сада — гэта нармальна?
(Шум у зале.)
Жаночы голас: «А забойства — гэта нармальна, чалавека?»
Мужчынскі голас: «Дзе лялькаводы расійскія дзеліся?»
Церцель: Лялькаводаў расійскіх вы пабачыце. Таварыш Бабарыка пойдзе ў суд, усё пройдзе галосна — і вы ўсё пабачыце.
Што тычыцца дэмакратыі… (Шум у зале.) Я ж вас слухаю ўважліва, правільна?.. Першае, калі браць з пазіцыі не глядзець інтэрнэт, а рэальныя рэчы — а тыя, пра якія я ведаю, ёсць дзве формы ўздзеяння на суседа: гарачая фаза вайны і прамая сіла — пакуль у нас мірна з суседзямі, але ідзе да гэтага, — другое — мяккая сіла так званая.
Мяккая сіла — гэта вылучэнне сродкаў, праекты, культурнае прасоўванне, якіх вы не адчуваеце. Вы думаеце, што сыр бясплатны — ён не бясплатны.
Голас з залы: Ды які сыр?
Церцель: Што датычыць дэмакратыі, то прасоўванне дэмакратыі — гэта прасоўванне Захадам сваіх інтарэсаў. Гэта мая суб’ектыўная пазіцыя як чалавека, які валодае сітуацыяй.
Я ўвогуле лічу, што дэмакратыя — гэта паліттэхналогія.
Голас з залы: Ды няўжо?
Церцель: Паспрабуйце мяне пераканаць у адваротным. Ёсць розныя тэорыі: і тэорыя эліт, і тэорыя грамадскай дамовы, хто вучыўся, ведае гэта ўсё. Па вялікім рахунку, гэта ўсё паліттэхналогіі.
Мяркуючы па аўдыязапісе сустрэчы Івана Церцеля, як і па відэа яго аналагічнага выступу на «Нафтане» ў Наваполацку ды іншых сустрэч дзяржаўных чыноўнікаў на прадпрыемствах, выступоўцы не разумеюць аўдыторыі і не ведаюць грамадскіх настрояў у цэлым.
Чыноўнікі выступаюць перад людзьмі так, нібы перад імі неадукаваныя людзі, якія ўсяму вераць, для якіх адзіная крыніца інфармацыі — БТ. Мяркуючы па рэакцыі залаў, на людзей гэта робіць катастрафічнае ўражанне.
«Вы тут нам заяўляеце, што наша сістэма робіць, а ў мяне вось работнікі з кавідам па два-тры дні чакаюць, пакуль іх у бальніцу накіруюць, бо няма месцаў. З тэлевізара — адно, а па факце — другое», — абурана заявіў у твар Церцелю работнік цэха «Карбамід».
«Дык гэта канцэпцыя нацыянальнай бяспекі, каб статыстыка была такой, легкатраўнай, скажам так?» — кпіў з кіраўніка КДБ іншы работнік.
«Яна не ў турме, а на спецдачы КДБ!» Канспіролагі накінуліся на Калеснікаву12
Каментары