Аб гэтым Лукашэнка заявіў на нарадзе з кіраўніцтвам Саўміна, дзе абмяркоўваюцца дакументы, якія закранаюць розныя сферы жыцця
«Мае падыходы па большасці пытанняў вядомыя. Пры абмеркаванні прапанаваных тэм найперш на чале павінны стаяць мэтазгоднасць, эканамічная эфектыўнасць і сацыяльная справядлівасць», — цытуе словы Лукашэнкі БелТА.
Ён звярнуў увагу, што, магчыма, будаўніцтва тых ці іншых аб'ектаў, якія не дадуць хуткай фінансавай аддачы, можна было б перанесці на наступныя гады.
Лукашэнка адзначыў, што ў праекце дзяржаўнай інвестыцыйнай праграмы прадугледжана будаўніцтва прыкладна 130 аб'ектаў на суму больш як 600 млн рублёў.
«Гэта не грошы для дзяржавы. Але тым не менш і тут павінна быць эканомія. Бо гэта прыклад іншым. Калі мы наверсе не ўмеем эканоміць і вылучыць найбольш важнае і неабходнае для развіцця, тады і губернатары, і старшыні выканкамаў будуць прытрымлівацца такіх жа прынцыпаў», — сказаў ён.
Па камерцыйных праектах ён паставіў аналагічныя пытанні.
«Свабодных, шалёных грошай няма. Тым больш для тых аб'ектаў, якія самі павінны прыносіць прыбытак. А любое зацягванне тэрмінаў іх рэалізацыі — гэта фінансавыя страты, якія хтосьці будзе вымушаны аплаціць», — сказаў Лукашэнка.
Абмеркаваныя таксама былі наступныя пытанні: карэкціроўка заканадаўства па пытаннях дзейнасці гаспадарчых таварыстваў, сфера электраэнергетыкі (удасканаленне заканадаўства ў гэтай галіне), аграэкатурызм.
Каментары