Большасць лабараторных пацукоў — самцы, і вось чаму гэта праблема
Мы яшчэ не ўсё ведаем пра розніцу полаў як у жывёл, так і ў людзей, але яна дакладна звязаная не толькі з гармонамі і рэпрадуктыўнай сістэмай.
Так здараецца, бо шмат хвароб, у тым ліку і кавід, па-рознаму ўздзейнічаюць на істот рознага полу. Калі не ўлічваць гэтую розніцу, вырасце імавернасць таго, што тую ці іншую хваробу няправільна дыягнастуюць ці вылечаць, тлумачыць CNN.
Зараз цяжка сказаць, клеткі істот якога полу часцей выкарыстоўваюць пры даследаваннях, але ўжо доўгі час прынята выкарыстоўваць у лабараторных эксперыментах менавіта пацукоў-самцоў. У 2011 годзе навукоўцы высветлілі, што падчас неўралагічных даследаванняў жывёлы-самцы выкарыстоўваюцца ў шэсць разоў часцей, чым самкі, і па стане на 2017 год сітуацыя не нашмат змянілася.
Пры гэтым жанчыны ўдзельнічаюць у клінічных даследаваннях з 1990-х гадоў, але выкарыстанне жывёл-самак на папярэдніх фазах эксперыментаў, якія таксама вельмі важныя, павялічваецца нашмат павольней.
Жанчынам часцей, чым мужчынам, ставяць няправільны дыягназ — напрыклад, у выпадку інфаркту або сіндрому дэфіцыту ўвагі і гіперактыўнасці. Звычайна жанчыны маюць больш пабочных эфектаў ад прыёму лекаў, і ў іх гэтыя эфекты больш выражаныя.
Некаторыя лекі, у тым ліку нестэроіды ібупрафен і напраксен, больш эфектыўна ўздзейнічаюць на мужчын, чым на жанчын. Бывае і наадварот: прэпарат аласэтрон, што дапамагае пры сіндроме раздражнёнага кішачніка, дазволены да ўжывання толькі жанчынам, бо пры выкарыстанні мужчынамі ён амаль не эфектыўны.
Мы яшчэ не ўсё ведаем пра розніцу полаў як у жывёл, так і ў людзей, але яна дакладна звязаная не толькі з гармонамі і рэпрадуктыўнай сістэмай. Згодна з даследаваннем мінулага года, гэтая розніца выражаецца ў больш чым 13 тысячах генаў. Акрамя таго, больш за 50 рысаў і функцый цела звязаныя з залежнымі ад полу мадэлямі рэгулявання дзеяння генаў.
Цяпер чытаюць
Ад рэкету да продажу фота магіл. Як выглядае знутры групоўка Project X, якая вярбуе людзей для перавозкі мігрантаў з Беларусі ў ЕС6
Каментары