Чэшскі суд адмяніў адмову ў міжнароднай абароне 23‑гадоваму беларусу Якаву Кудзялевічу, які правёў 73 дні ў коме
21 жніўня суд разгледзеў апеляцыю на адмову ў міжнароднай абароне 23‑гадоваму беларусу Якаву Кудзялевічу і вынес рашэнне на карысць маладога чалавека.
Пра гэта ў сваім фэйсбуку паведаміў ягоны бацька Дзмітрый Кудзялевіч.
— Рашэнне на нашу карысць! Наглядны прыклад, як незалежна адна ад адной працуюць дзве галіны ўлады — судовая і выканаўчая, — напісаў Кудзялевіч.
Якаў Кудзялевіч пакінуў Беларусь пасля пратэстаў 2020 года, калі яму было 17 гадоў. Ён некалькі гадоў вучыўся ў Чэхіі, аднак пазней сутыкнуўся з праблемамі легалізацыі і падаў заяву на міжнародную абарону. Ягоны бацька Дзмітрый жыве ў Польшчы.
Міністэрства ўнутраных спраў Чэхіі першапачаткова адмовіла маладому чалавеку ў абароне, пасля чаго рашэнне было абскарджана ў судзе.
На пачатку красавіка сын перастаў кантактаваць з бацькам. У выніку Якава знайшлі без прытомнасці на падлозе ў ягоным пакоі ў прыёмным цэнтры для мігрантаў, якія хадайнічаюць аб міжнароднай абароне. Паводле дактароў Якаў прыняў шэраг медычных прэпаратаў і знаходзіўся без прытомнасці адзін каля сутак. Хлопца тэрмінова перавезлі ў шпіталь. У коме ён правёў 73 дні, а ў канцы чэрвеня выйшаў з яе.
Дзмітрый Кудзялевіч расказваў, што яму 24 чэрвеня нечакана патэлефанавала жонка і сказала: «Дзмітрый, з табой хоча пагаварыць сын. Для мяне гэта было як гром сярод яснага неба. 73 дні сын знаходзіўся ў глыбокай коме. І калі я ўзяў слухаўку, ён кажа: «Добры дзень, тата». Гэта цяжка перадаць, наколькі гэта было моцна і пранікліва».
Каментары