Пуцін у размове пра Украіну нагадаў пра бамбардзіроўку Югаславіі. Чаму параўноўваць Украіну і Югаславію некарэктна?
Прэзідэнт Расіі Уладзімір Пуцін, каментуючы асцярогі краін Захаду наконт расійскага ўварвання ва Украіну, нагадаў аб бамбардзіроўцы НАТА Белграда ў 1999 годзе. Пра гэта ён сказаў падчас брыфінгу па выніках перамоваў з канцлерам Германіі Олафам Шольцам.
«Мы з вамі былі сведкамі вайны ў Еўропе… У Югаславіі. Буйная вайсковая аперацыя з нанясеннем ракетна-бомбавых удараў па адной з еўрапейскіх сталіц, па Бялградзе… Без санкцыі Рады Бяспекі ААН», — нагадаў з усмешкай Пуцін.
З ягоных слоў, гэта «вельмі дрэнны прыклад», які Расія нібыта не хацела б паўтараць у дачыненні да Украіны.
«Хочам мы гэтага, ці не? Вядома, не», — заявіў расейскі прэзідэнт.
Пры гэтым ён падкрэсліў, што
далейшыя дзеянні Расіі ў дачыненні да Украіны залежаць ад таго, ці пойдуць ЗША і Паўночнаатлантычны альянс на выкананне патрабаванняў Крамля.
Такім чынам прэзідэнт Расіі вырашыў правесці паралелі паміж сітуацыяй ва Украіне і ў Югаславіі, намякнуўшы пра магчымы варыянт расійскай агрэсіі супраць Украіны:
без адкрытага ўварвання войскаў, але з бамбардзіроўкай стратэгічных і вайсковых аб'ектаў.
Ці карэктна параўноўваць сітуацыю ва Украіне і Югаславіі? Абсалютна некарэктна.
Аперацыя НАТА супраць рэжыму Слабадана Мілошавіча ў Югаславіі ў 1999 годзе была адказам на этнічныя чысткі супраць баснійскіх мусульман, а пасля — і косаўскіх албанцаў.
Міжнародны трыбунал па былой Югаславіі пацвердзіў адказнасць югаслаўскіх службаў бяспекі за злачынствы супраць чалавечнасці ў дачыненні да албанскага насельніцтва Косава.
Шматлікія албанскія культурныя аб'екты ў Косаве былі знішчаныя падчас Косаўскай вайны, што з'яўлялася ваенным злачынствам.
Умяшанне НАТА было класічнай гуманітарнай інтэрвенцыяй, неабходнай для спынення генацыду насельніцтва.
Вынікам аперацыі НАТА супраць Югаславіі стала спыненне этнічных чыстак і вайны ў Косава.
Ва Украіне і блізка няма нічога падобнага.
У адрозненне ад Югаславіі часоў Мілошавіча, Украіна з'яўляецца дэмакратычнай дзяржавай, у якой няма ні этнічных чыстак, ні сістэмнай дыскрымінацыі нацыянальных меншасцяў. Прэзідэнтам Украіны з'яўляецца рускамоўны яўрэй.
Хоць Крэмль і спрабуе надаць канфлікту на Данбасе этнічную афарбоўку (маўляў, рускае насельніцтва выступае супраць «кіеўскіх нацыяналістаў»), гэтае тлумачэнне канфлікту нікуды не вартае.
На тэрыторыі, падкантрольнай Украіне, спакойна жывуць мільёны этнічных рускіх, і ім не пагражаюць ні этнічныя чысткі, ні сістэмная дыскрымінацыя.
-
«Здзелка згарэла». Аўтар кнігі «Аўтарытарызм пад пагрозай» пералічыў падставы для аптымізму наконт будучыні Беларусі
-
«Пра нешта мы не гаворым, памоўчваем». Лукашэнка з цяжкасцю гаварыў, але настройваў генералаў на барацьбу за мір да апошняй кроплі крыві
-
Беларускі інтэрнэт пад ботамі: як іх распазнаваць і што з імі робяць
Цяпер чытаюць
А мы вам казалі: «не думайце, што гэта капейкі»! Сталі вядомыя звесткі, колькі падаходнага беларусы Літвы пералічылі розным грамадскім структурам17
Каментары