Столтэнберг: НАТА войскаў ва Украіне не мае і накіроўваць не збіраецца
Генеральны сакратар НАТА Енс Столтэнберг выступіў на спецыяльным брыфінгу ў Бруселі ў сувязі з нападам Расіі на Украіну, але так і не даў адназначнага адказу на пытанне, ці акажа альянс Украіне ваенную дапамогу. Пра гэта піша «Еўрапейская праўда».
«НАТА падтрымлівае Украіну, знаходзіцца ў блізкай каардынацыі з ЕС, а таксама партнёрамі па ўсім свеце, каб увесці жорсткія санкцыі супраць Расіі. Саюзнікі НАТА таксама доўгі час аказвалі практычную падтрымку, каб узмацніць Узброеныя сілы Украіны», — сказаў Столтэнберг.
Генеральнага сакратара наўпрост спыталі, ці плануе НАТА пасылаць войскі на тэрыторыю Украіны, на што ён адказаў, што
«НАТА будзе абараняць усіх сваіх саюзнікаў у выпадку нападу, і таму была павялічаная прысутнасць на ўсходніх флангах тысячамі вайсковых караблёў і самалётаў».
Калі яго другі раз запыталіся пра тое ж, ён адзначыў, што НАТА спрабавала перашкодзіць канфлікту, папярэджваючы аб планах Масквы і пагражаючы санкцыямі.
«Расія зачыніла дзверы для дыпламатычнага рашэння», — сказаў ён.
Пазней Столтэнберг дадаў, што НАТА не мае войскаў на тэрыторыі Украіны і не плануе накіроўваць.
Столтэнберг дадаў, што Паўночнаатлантычны альянс збірае тэрміновы саміт па відэасувязі, каб прыняць рашэнне аб далейшых дзеяннях.
Што да бягучых ваенных дзеянняў ва Украіне і агульнай міжнароднай і рэгіянальнай сітуацыі, то Столтэнберг адзначыў наступнае:
— Мэты Расіі не абмежаваныя Украінай, Расія дамагаецца адводу сіл НATА з Усходняй Еўропы;
— НАТА і Еўрасаюз маюць намер працягваць палітыку санкцый супраць Расіі, нават калі гэта будзе азначаць страты для іх саміх;
— Ваенная аперацыя Расіі ва Украіне не ўмацуе стратэгічную бяспеку Расіі;
— НАТА мае намер даць Украіне, Грузіі, Малдове і Босніі і Герцагавіне больш дапамогі для дэмакратыі;
— НАТА дадаткова размясціла на ўсходзе альянсу тысячы вайскоўцаў, больш за 100 самалётаў у высокай гатоўнасці, звыш 120 караблёў;
— НАТА працягне пастаўляць зброю Украіне, уключаючы сістэмы СПА.
Каментары