Дарадца Офіса Зяленскага Аляксей Арастовіч даў вялікае інтэрв’ю «Медузе», у якім прааналізаваў два месяцы расійскай агрэсіі. Закрануў ён і пытанне ўдзелу Беларусі ў гэтай вайне.
«Беларусь спрабавалі ўцягнуць у вайну вельмі актыўна. Лукашэнка віхляе як можа — і, па нашых даных, актыўна вядзе сепаратныя перамовы з Захадам. Нам і беларуская апазіцыя пра гэта кажа, і заходняя разведка. Яны кажуць без падрабязнасцяў, але агульны характар: «Я не вінаваты, ён сам да мяне прыйшоў». Але беларуская тэрыторыя і беларуская ваенная інфраструктура — аэрадромы, базы забеспячэння, чыгуначная сетка — цалкам выкарыстоўваліся супраць нас. Адтуль пускалі ракеты, лётала авіяцыя, наступалі войскі. Гэта па азначэнні з'яўляецца ваеннай агрэсіяй.
Але мы спецыяльна не ставілі гэтае пытанне, бо мы разумеем саму Беларусь і вельмі выразна падзяляем беларускі народ і беларускія ўлады. А тое, што беларускі народ быў супраць, мы бачылі.
Цяпер беларускую тэрыторыю выкарыстоўваюць ужо вельмі мала, практычна не выкарыстоўваюць. Авіяцыя ўжо даўно не дзейнічае, ракетамі практычна не страляюць. Ну пару эпізадычных пускаў было. А яшчэ беларускія партызаны ўмудрыліся сапсаваць чыгуначную сетку. Я іх да гэтага заклікаў, і на мяне ў Беларусі завялі крымінальную справу за тэрарызм. Але, як бачыце, не дарма заклікаў. Рэальна сапсавалі, і рэальна вельмі моцна ўскладнілі жыццё расійскім войскам. А Лукашэнка здолеў адпятляць. І за беларускую тэрыторыю можна больш не хвалявацца», — рэзюмаваў Арастовіч.
Цяпер чытаюць
26‑гадовага супрацоўніка элітнага падраздзялення мытні асудзілі на 16 гадоў па наборы палітартыкулаў. Сярод іх і «здрада дзяржаве»4
Каментары