Дзярждэп ЗША пацвердзіў, што дзяржсакратар Энтані Блінкен і міністр абароны Лойд Осцін у нядзелю ў Кіеве сустрэліся з прэзідэнтам Украіны Уладзімірам Зяленскім. Гэта першы візіт высокапастаўленых амерыканскіх чыноўнікаў ва Украіну пасля пачатку расійскага ўварвання. Ён быў закрытым і пра яго не паведамлялася афіцыйна.
Украіне была абяцаная дадатковая вайсковая дапамога на суму 713 млн даляраў.
«Хочацца, каб мы мелі цяжкае магутнае ўзбраенне», — казаў Зяленскі да сустрэчы, дадаўшы, што ў апошні тыдзень сітуацыя з пастаўкамі зброі палепшылася.
Па словах Блінкена, у панядзелак Байдэн прызначыць новага пасла ЗША ў Украіне. Папярэдняя пасол Мары Яванавіч завяршыла працу ў Кіеве датэрмінова, у 2019 годзе.
Новым амбасадарам, як чакаецца, стане Брыджыт Брынк, цяперашняя амбасадарка ЗША ў Славакіі.
Дзяржсакратар ЗША таксама паабяцаў, што ў Кіеў пачнуць паступова вяртацца дыпламаты, якія з'ехалі з-за вайны.
Пасля Кіева міністр абароны ЗША Осцін накіруецца ў Нямеччыну, дзе на амерыканскай базе Рамштайн правядзе сустрэчу з прадстаўнікамі 20 краін для абмеркавання вайсковай дапамогі Украіне.
Каментары