У офісе гандлёвай сеткі ОМА праходзіць ператрус — пад будынкам стаяць чорныя бусы, паведамляюць супрацоўнікі. Буйны акцыянер сеткі раней прыпыніў дзейнасць у Беларусі, кампанія перастала закупляць беларускія і расійскія тавары з-за нападу Расіі на Украіну, нагадвае Zerkalo.io.
Пра ператрусы ў галаўным офісе ананімна паведамілі два супрацоўнікі кампаніі, работнік адной з крам сеткі распавёў, што характэрныя для сілавікоў машыны ля будынка заўважыў кур'ер.
— Кажа, на галоўным офісе стаіць шмат чорных бусаў. У іх ужо нікога не было, сілавікі ўжо ў офісе, як мы зразумелі. У краме ўсё спакойна, працуем як звычайна. Ніхто нічога не кажа, калі б не кур'ер, які прыехаў і нам пра гэта сказаў, то наогул цішыня. Ніхто б нічога і не ведаў. Мабыць, яшчэ адна кампанія трапіла ў няласку, — напісаў малады чалавек.
Па словах другога супрацоўніка «ОМА», яго калегі, якія ў гэты час павінны знаходзіцца ў будынку, не выходзяць на сувязь. Адказваюць толькі тыя, хто дома. Ён таксама кажа, што бачыў мікрааўтобусы. Заўважыў, што яны былі без дзяржнумароў.
— Мінімум тры, — удакладняе ён. — На паркоўцы — супрацоўнікі ў экіпіроўцы. У аднаго я бачыў вялікімі літарамі на плячы надпіс «КДБ». У нас васьміпавярховы будынак, арандаваны, але цалкам заняты ОМА. Унутры можа быць шмат чалавек.
Zerkalo не ўдалося звязацца з кіраўніцтвам. У кантакт-цэнтры пакуль не ведаюць, што адбываецца ў галоўным офісе, там не змаглі пацвердзіць гэтую інфармацыю.
— Магчыма, але нам не даюць такую інфармацыю. Мы знаходзімся дыстанцыйна, — адказалі па тэлефоне.
Нагадаем, у сярэдзіне мая стала вядома, што фінска-літоўская кампанія «Kesko Senukai» прыпыніла дзейнасць у Беларусі і выходзіць са складу акцыянераў гандлёвай сеткі ОМА. Планавалася, што продаж долі завершаць у найбліжэйшы час, аднак канкрэтныя тэрміны не паведамляліся. Усе гандлёвыя адносіны з беларускай сеткай былі спыненыя яшчэ ў красавіку. Акрамя таго, кампанія прыпыніла закупкі расійскіх і беларускіх тавараў. Прычына такога рашэння — расійскае ўварванне ва Украіну.
Цяпер чытаюць
На Купянскім кірунку загінуў беларускі добраахвотнік Аляксей «Рыжы» Аўдзей11
Каментары