Даследаванне: сабакі насамрэч могуць разумець чалавечую дабрыню
Паводле працы аўстрыйскіх даследчыкаў, сабакі здольныя разумець намеры людзей. Навукоўцы высветлілі гэта падчас эксперыменту, калі яны наўмысна або ненаўмысна адмаўлялі сабакам у ежы і сачылі пры гэтым за іх рэакцыяй, піша The Times.
Каманда з Венскага універсітэта ветэрынарнай медыцыны правяла эксперымент, у якім паўдзельнічалі 96 сабак розных парод і ўзростаў. Навукоўцы хацелі вызначыць, наколькі сабакі здольныя ўспрымаць чалавечыя намеры і разумеюць людзей. Напрыклад, калі чалавек чагосьці не робіць, то ён не можа, альбо спецыяльна гэтага не жадае?
Удзельніцу каманды змясцілі ў празрыстую скрыню з дзіркамі ў пярэдняй панэлі. Калі да скрыні падыходзіў сабака, даследчыца спрабавала перадаць яму кавалак каўбасы праз дзіркі ў панэлі.
Часам эксперыментатарка падносіла ежу да дзіркі, але потым хутка адцягвала руку ад панэлі, нібыта дражніла сабаку. У іншых выпадках жанчына працягвала руку да дзіркі, а потым нібыта выпадкова ўпускала каўбасу з рук.
Сабакі рэагавалі больш нецярпліва ў тых выпадках, калі чалавек нібыта не хацеў даваць ім ежу, чым тады, калі ў яго выпадкова не атрымоўвалася гэта зрабіць. Сваё стаўленне жывёлы выказвалі тым, што радзей падыходзілі да эксперыментатаркі і часцей ад яе адыходзілі. Таксама яны больш часу ляжалі — як сведчыць іншая праца, сабакі так робяць, калі чалавек, які за імі назірае, забараняе ім есці.
Калі чалавек «выпадкова» не мог даць сабакам каўбасу, яны часцей махалі хвастом у правы бок. Меркавана, такі кірунак звязаны з левым паўшар’ем мозга сабак, у якім апрацоўваюцца станоўчыя эмоцыі, таму можна зрабіць выснову, што ў такіх выпадках жывёлы добра ставіліся да эксперыментатаркі.
Вайна і хвастатыя сябры. Шчымлівыя гісторыі пра выпрабаванні і любоў
Сабака штоночы прыходзіў да немаўляці для таго каб упэўніцца, што з ім усё добра. Гэтае ВІДЭА стала вірусным
-
Навуковец распавёў пра геалагічныя загадкі Беларусі: іртуць з зямлі і кратар ад падзення метэарыта, які знішчыў усё жывое ў радыусе тысяч кіламетраў
-
Фальсіфікацыі ў даследаваннях хваробы Альцгеймера. Як вынікі прывялі не туды
-
Беларускія вучоныя пахваліліся папяровымі кубачкамі, вырабленымі па новай тэхналогіі. Такія то рабілі даўно, але нашы дадалі іншае рэчыва
Каментары