Атрымальнікам дапамогі і не толькі. Каму яшчэ неабходна адкрыць базавы рахунак да 20 чэрвеня
Мяняецца парадак выплаты сацыяльных дапамог праз банкі. Тым, у каго няма базавага рахунку, неабходна звярнуцца ў банкаўскую ўстанову і адкрыць базавы рахунак да 20 чэрвеня. Як гэта зрабіць, Мінск-Навінам расказала начальнік упраўлення пенсій і дапамог камітэта па працы, занятасці і сацыяльнай абароне Мінаблвыканкама Алена Жывіца.
— З 1 ліпеня пенсіі і дапамогі на дзяцей, прызначаныя органамі сацыяльнай абароны, а таксама дапамогі па беспрацоўі, па доглядзе за непрацаздольнымі, адрасная сацыяльная дапамога, выплаты асобам, якія ажыццяўляюць догляд у замяшчальнай сям’і, пры нараджэнні двайнят будуць пералічвацца толькі на базавыя рахункі, — падкрэслівае А. Жывіца. — Таму тым, у каго няма такога рахунку, неабходна звярнуцца ў адзін з дзевяці банкаў і адкрыць базавы рахунак альбо перааформіць дзеючы (разліковы) у базавы. Плаціць за адкрыццё базавага рахунку не трэба: ён афармляецца бясплатна. Пры гэтым, каб своечасова атрымаць выплаты ў ліпені, зрабіць гэта неабходна да 20 чэрвеня.
Начальнік упраўлення пенсій і дапамог тлумачыць, што базавы рахунак — гэта банкаўскі рахунак у беларускіх рублях, з уладальніка якога не спаганяецца плата за ажыццяўленне аперацый, уключаных у базавыя ўмовы абслугоўвання. Да такіх адносяцца самыя неабходныя аперацыі — залічэнне і зняцце грашовых сродкаў, аплата тавараў і паслуг у АРІП і іншыя. Поўны пералік можна даведацца ў банку.
— Адкрыць базавы рахунак або перааформіць дзеючы можна бясплатна ў любым з дзевяці банкаў. Гэта ААТ «Белаграпрамбанк», ААТ «Белгазпрамбанк», ЗАТ «МТБанк», ААТ «Беларусбанк», ААТ «Беларускі банк развіцця і рэканструкцыі «Белінвестбанк», ААТ «Прыёрбанк», ААТ «Белвэб», ААТ «Банк Дабрабыт», ААТ «Сбер Банк», — тлумачыць суразмоўніца.
Па пытаннях змянення правілаў пералічэння сацыяльных выплат на рахункі ў банках неабходна звяртацца ў раённае ўпраўленне па працы, занятасці і сацыяльнай абароне або непасрэдна ў банк. Змены, што ўступаюць у сілу з 1 ліпеня, не датычацца атрымальнікаў пенсій ва ўзросце 70 гадоў і старэй, інвалідаў, якія ўжо выбралі спосаб атрымання пенсіі праз аб’екты паштовай сувязі. Ім, як і раней, пенсія будзе дастаўляцца дадому супрацоўнікамі пошты або выплачвацца непасрэдна на пошце.
— Звяртаю ўвагу, што пры адсутнасці базавага рахунку на 1 ліпеня пералічэнне сацыяльнай выплаты прыпыняецца. Аднаўленне адбудзецца толькі пасля адкрыцця базавага рахунку. Грошы не знікнуць — проста іх выплацяць пазней, — удакладняе суразмоўніца.
Цяпер чытаюць
На аўташоу ў Лідзе ледзь не загінуў адзін з самых знакамітых каскадзёраў Беларусі — яго відэа сабралі амаль паўмільярда праглядаў. Што з ім цяпер?3
Каментары