У цэнтры Гродна пачалі будоўлю і выкапалі старадаўнія падвалы. Але археалагічных раскопак не праводзілі
У гістарычным цэнтры Гродна задумалі будоўлю. Яна з'явіцца на невялікім пятачку паміж домам купца Мураўёва і новым будынкам апарт-гатэля на Калючынскай, 23. Там ужо працуе тэхніка і нават паказаліся старадаўнія падвалы. Мясцовыя неабыякавыя жыхары занепакоеныя: участак уваходзіць у зону аховы культурнага пласта, але чамусьці перад будаўнічымі работамі археалагічныя раскопкі не правялі. «Анлайнер» запытаў тлумачэнне гэтага ў навукоўца, які вядзе нагляд за работамі на месцы.
У Гродне гэтымі днямі працуе кандыдат гістарычных навук Андрэй Вайцяховіч, прадстаўнік Інстытута гісторыі НАН Беларусі. Ён вядзе археалагічны нагляд.
«На гэтым месцы стаяў дом купца Лапіна 1875 года пабудовы, — распавёў навуковец. — Будынак згарэў у вайну і наогул моцна пацярпеў. Сцены стаялі да 1954 года, калі камісія разгледзела дом і прыйшла да высновы, што ўсё пабіта, падвалы таксама, аднавіць будынак немагчыма. Дом знеслі, прычым падвалы прабілі наскрозь і літаральна засыпалі ў іх увесь будынак, утрамбавалі.
Зараз мы бачым толькі маленькія фрагменты, рэшткі скляпенняў — яны захаваліся там, дзе былі ўваходы. Яны невялікія, літаральна 1,5 метра. Астатняе ўсё пабіта і паламана, на жаль. Культурны пласт на гэтым месцы не захаваўся».
Менавіта таму не праводзілі археалагічныя раскопкі, растлумачыў суразмоўца.
«Там уручную нічога немагчыма зрабіць, нават экскаватар гэтыя ўтрамбаваныя завалы ледзь разбірае».
Крыху пазней стала вядома, што разбураныя рэшткі падвалаў вывозяць з пляцоўкі.
«Што з імі яшчэ можна зрабіць? Ёсць зацверджаны праект, па якому падмурак новага будынка павінен быць маналітным, з палямі, бо тут слабы грунт. Тут або будынак ставіць, або захоўваць рэшткі ранейшага падмурка», — распавёў суразмоўца.
Пры гэтым сёе-тое ў насыпным пласце выявілі.
«Значыць, за XVII-XVIII стагоддзі цікавыя фрагменты пячной кафлі, манеты таго ж часу, — каля 30 знаходак».
У куце, які знаходзіцца за межамі знесенага дома, — пласт гною.
«Хутчэй за ўсё, гэта яма, запоўненая драўнянай дранкай і гноем. Вось там робім шурф, раскоп уручную, каб праверыць глыбіню залягання, хаця б паглядзець на кантэкст, — сказаў на заканчэнне Вайцяховіч.
Участак у цэнтры Гродна плошчай 8 сотак выкупіў на аўкцыёне мясцовы бізнэсмен Станіслаў Сямашка. Тут дазволілі пабудаваць аб'ект грамадскага прызначэння, напрыклад, гасцініцу, магазін, офісы або медцэнтр. Выданне «Вечерний Гродно» адзначала: праект павінен улічваць выгляд і канфігурацыю страчанай пабудовы, якая тут знаходзілася раней.
Цяпер чытаюць
Бабарыка заявіў пра вяртанне ў палітыку і назваў вінаватага ў тым, што змены не адбыліся ў 2020-м28
Бабарыка заявіў пра вяртанне ў палітыку і назваў вінаватага ў тым, што змены не адбыліся ў 2020-м
Дзеці злізвалі з бруднай падлогі пралітае малако. Якой пабачыў замежнік Беларусь, спустошаную расійскімі і шведскімі войскамі ў час Паўночнай вайны1212
Каментары