У Польшчы ў горадзе Галеняў адкрылі газаправод Baltic Pipe. Па ім ў Польшчу будзе пастаўляцца праз Данію газ з Нарвегіі — 10 млрд кубаметраў штогод.
«Эпоха расійскага дамінавання ў газавай сферы падыходзіць да канца: эпоха, адзначаная шантажом, пагрозамі і вымагальніцтвам», — цытуе словы польскага прэм'ер-міністра Матэвуша Маравецкага pap.pl.
«Сёння мы нарэшце адкрываем газаправод, які дзесяцігоддзямі быў польскай марай тых, хто меў бачанне дыверсіфікацыі паставак газу ў Польшчу, узмацнення суверэнітэту і забеспячэння незалежнасці ад паставак з Расіі», — адзначыў на адкрыцці газаправода польскі прэзідэнт Анджэй Дуда.
Baltic Pipe злучыў газаправодам Польшчу і Данію. Таму ў мерапрыемстве ўдзельнічала прэм'ер-міністр гэтай краіны Мэтэ Фрэдэрыксэн.
Чакаецца, што газ з Нарвегіі пачне пастаўляцца ў Польшчу і ў суседнія краіны з 1 кастрычніка, а да зімы газаправод запрацуе на поўную магутнасць. Пастаўкі будуць забяспечаныя за кошт здабычы сумесным прадпрыемствам з удзелам польскага капіталу, а таксама за кошт кантрактаў, заключаных кампаніяй PGNiG.
Каментары