Магілёўскі абласны суд завяршыў разгляд крымінальнай справы жыхара Асіповічаў Аляксея Шышкаўца, абвінавачанага ў тэрарызме (арт. 289 КК), і ва ўдзеле на тэрыторыі замежнай дзяржавы ва ўзброеным фармаванні (ч. 3 арт. 361 КК), паведамляе «Вясна».
Справу разглядаў суддзя Сяргей Мазураў.
Аднаго з беларускіх «рэйкавых партызан», палітвязня Аляксея Шышкаўца затрымалі ў сакавіку 2022 года.
Па інфармацыі МУС, на пачатку 2022 года мужчына «увайшоў у склад экстрэмісцкага фармавання ByPol, аўтарызаваўшыся ў мабілізацыйным чат-боце для здзяйснення супрацьпраўных дзеянняў у Беларусі».
А 1 сакавіка ён нібыта атрымаў указанні па блакаванні чыгуначных шляхоў, а таксама па вырабе і выкарыстанні «кактэйляў Молатава».
У верасні 2022 г. КДБ уключыў Шышкаўца ў спіс асобаў, «датычных да тэрарыстычнай дзейнасці».
Судовы працэс у дачыненні да Аляксея доўжыўся амаль тры тыдні.
У выніку суддзя Сяргей Мазураў асудзіў мужчыну да 11 гадоў пазбаўлення волі ва ўмовах узмоцненага рэжыму.
Раней некаторым «рэйкавым партызанам» з іншых гарадоў таксама ўжо вынеслі вялікія тэрміны. Так, супрацоўніка Віцебскай дыстанцыі сігналізацыі і сувязі Сяргея Канавалава прысудзілі да 15 гадоў калоніі ўзмоцненага рэжыму — ён нібыта планаваў вывядзенне са строю сістэмы, якія забяспечваюць бяспеку чыгуначнага руху.
Трое «партызан» з Бабруйска атрымалі ад 14 да 16 гадоў калоніі ўзмоцненага рэжыму.
У суд ужо перадалі справу «рэйкавых партызан» з Мазыра. Аднаго будуць судзіць па чатырох артыкулах, другога — па сямі.
Цяпер чытаюць
«Яна даўнавата ў Беларусі». Бацька Анжалікі Мельнікавай прызнаўся, што яна жывая і здаровая90
Каментары