Бабруйскі хлопец скраў чатыры аўто, каб паехаць на вёску, але далёка ўсё адно не заехаў
5 лістапада 18-гадовы хлопец, рабочы аднаго з прадпрыемстваў Бабруйска, вырашыў, што яму трэба абавязкова з'ездзіць у родную вёску ў Мінскім раёне, прытым зрабіць гэта на машыне. А паколькі не меў сваёй, то, выпіўшы для смеласці алкаголю, пайшоў шукаць першую лепшую. І лёгкадаступных для ўгону аўто аказалася ў горадзе на дзіва шмат, піша Komkur.info.
Пасля заканчэння працоўнага дня хлопец нагледзеў аўтамабіль ВАЗ-21053, які стаяў у завулку Леніна, адчыніў незамкнутыя дзверы у ім, завёў злучэннем драцінак і выехаў у дарогу. Але ўжо праз пару соцень метраў, не здолеўшы даць рады з пераключэннем перадач, кінуў гэту машыну і перасеў на іншую — ВАЗ-2101.
Калі і гэтая машына праз кіламетр дарогі перастала ехаць, юнак знайшоў на бабруйскім Георгіеўскім праспекце незамкнуты «Форд Мандэа», але і на ім ледзь змог выехаць толькі з двара. А апошнім трафеем стала старая «капейка», падарожжа на якой таксама скончылася праз некалькі хвілін, бо заклініла каробку перадач.
Пасля таго юнак заўважыў, што недзе згубіў свой тэлефон і пайшоў яго шукаць па тых мясцінах, у якіх пабываў раней. Каля «Форда», які ён спрабаваў скрасці за гадзіну да таго, ужо завіхаўся гаспадар. Хлопец запытаўся ў яго пра тэлефон, а скончылася ўсё тым, што пацярпелы патэлефанаваў у міліцыю.
У дачыненні да хлопца завялі крымінальную справу па частцы 2 артыкула 214 КК («Крадзеж транспартнага сродку, учынены паўторна»).
Беларускія рэпетытары ў паніцы: праз праблемы «Яндэкса» яны могуць страціць матэрыялы, якія напрацоўвалі гадамі27
Каментары