Фігуранты справы Tut.by пазнаёміліся з матэрыяламі справы, у хуткім часе яна будзе перададзена пракурору. Пра гэта распавёў першы намеснік старшыні Следчага камітэта Алег Шандаровіч.
Паводле яго слоў, частка абвінавачаных па справе Tut.by праходзіць па экстрэмісцкіх артыкулах, але наогул справа пачыналася з абвінавачвання ў нявыплаце падаткаў, і менавіта гэты артыкул з'яўляецца асноўным.
«Цяпер расследаванне завершана. Усім фігурантам выстаўленыя абвінавачванні, і яны ўжо азнаёміліся з матэрыяламі крымінальнай справы. У найбліжэйшы час крымінальная справа будзе перададзена пракурору. Як я ўжо сказаў, большасць фігурантаў абвінавачваецца ў нявыплаце падаткаў. Амаль усе яны заявілі хадайніцтва кіраўніку дзяржавы аб памілаванні, пакрылі шкоду ў поўным аб'ёме і ўнеслі крымінальна-прававую кампенсацыю. Большасць абвінавачаных супрацоўнічалі са следствам, таму ім змянілі меру стрымання. Цяпер пад вартай знаходзяцца толькі двое фігурантаў», — заявіў Шандаровіч.
Двое фігурантаў, якія дагэтуль знаходзяцца ў СІЗА, — гэта генеральны дырэктар «Тут бай медыя» Людміла Чэкіна і рэдактар Tut.by Марына Золатава.
Пасля таго, як іх ўключылі ў спіс «асоб, якія маюць дачыненне да тэрарыстычнай дзейнасці», стала вядома, што яны з'яўляюцца абвінавачанымі па двух «экстрэмісцкім» артыкулах: арт. 130 (Распальванне сацыяльнай варожасці) і арт. 361 (Заклікі да санкцый і іншых дзеянняў, накіраваных на прычыненне шкоды нацбяспецы) КК Беларусі.
Пагром Tut.by адбыўся роўна паўтара года таму, 18 мая 2021 года. Тады былі арыштаваныя 15 чалавек.
Цяпер чытаюць
Хрыста Грозеў: Мельнікава як мінімум год, а хутчэй за ўсё, паўтара перадавала інфармацыю беларускім спецслужбам56
Каментары