ДАІ агарадзіла ровар хлопчыка пасля ДТЗ, а яго сцягнулі на металалом
На гэтым тыдні, 20 мая, у сталіцы адбылася аварыя з 8-гадовым раварыстам, піша Onliner.by.
Здарэнне зафіксавала сістэма відэаназірання на вуліцы Маршала Лосіка. Пакуль дзіця разам з татам знаходзілася ў бальніцы, гісторыя атрымала нечаканы працяг.
Пра ДТЗ паведамлялі ў ДАІ: «37-гадовы кіроўца аўтамабіля Peugeot, рухаючыся па вуліцы Маршала Лосіка, пры павароце налева на прылеглую тэрыторыю дома №28 па згаданай вуліцы не саступіў і здзейсніў наезд на 8-гадовага раварыста, які перасякаў праезную частку ў жылой зоне па лініі тратуараў».
Пасля аварыі, як распавядае бацька хлопчыка, ДАІ агарадзіла зламаны напалам ровар конусамі. Дзмітрый жа паехаў з сынам у бальніцу:
— Ён атрымаў удар па двух зубах, таму яму паставілі капу. Яшчэ ў яго былі зашытыя вусны
Вярнуўшыся на месца ДТЗ, Дзмітрый ровара не знайшоў. Інспектары, па словах мужчыны, таксама развялі рукамі.
— Я так разумею, што ДАІ павезла кіроўцу на медагляд, а потым вярнулася на месца, калі ровара ўжо не было, — дадаў бацька хлопчыка.
Дзмітрыю давялося звярнуцца ў таварыства ўласнікаў, каб атрымаць відэа з камер назірання. Вось гэты запіс: на ім бачна, як невядомы мужчына пад’ехаў на мапедзе і забраў ровар.
— Суседзі далі прыкладны адрас гэтага мужчыны: ён па наваколлі збірае металалом. Так я яго і знайшоў. Ён патлумачыў, што ўбачыў зламаны ровар, паглядзеў па баках — нікога няма… Ну, напэўна, нікому і не патрэбны. Усё вярнуў без праблем і канфліктаў, — адзначыў Дзмітрый.
Цяпер чытаюць
Telegram выдаліў свой афіцыйны беларускі канал — верагодна, каб не падстаўляць людзей. Але многія паспелі падставіцца7
Каментары
[Зрэдагавана]