СТБ: Расія нават цвіка зрабіць не можа, а Пуцін чалавек з асаблівасцямі
Расія — краіна, якая апынулася ў нявыкрутцы з-за санкцый, аднак Беларусь як тэхналагічна больш развітая выратуе суседнюю дзяржаву. Тое, што Крэмль хоча паглынуць Беларусь, — канспіралогія, а Пуціну як роднаму чалавеку мы даруем яго недасканаласці. Пра гэта гаварылі ў сюжэце СТБ напярэдадні прыезду Пуціна ў Беларусь.
Прэзідэнт Расіі Уладзімір Пуцін не быў у Беларусі 3,5 года, прытым што Лукашэнка лётаў да яго рэгулярна. Гэта дало нагоду меркаваць, што Пуцін едзе ціснуць на Лукашэнку і ў пытаннях інтэграцыі, і ў пытаннях удзелу Беларусі ў вайне.
Вядучыя сюжэта даводзяць, што галоўная тэма перамоваў — «пытанне антысанкцыйнага ўзаемадзеяння», якое цяпер «актуальнае для Расіі нават больш, чым для Беларусі».
Вядучыя прыгадалі выказванні Валянціны Мацвіенка, якая адкрыла для сябе, што ў Расіі нават сваіх цвікоў не выпускаюць. «І тады расійскія губернатары, якія выбудоўвалі з намі адносіны, паглядзелі на нашу краіну па-новаму».
Паводле СТБ, раней у Расіі пра Беларусь думалі, што «мы бульбу толькі вырошчваем, а па факце высокатэхналагічныя рэчы мы ўмеем рабіць, а што не ўмеем, хутка вучымся».
Абмеркавалі на СТБ і гучныя загалоўкі ў СМІ, што Крэмль хоча паглынуць Беларусь.
Хаця тэму вайны вядучыя цалкам абмінулі, аднак заўважылі, што «для тых, хто ў танку, Аляксандр Лукашэнка ў пятніцу 1001-шы, ужо, напэўна, раз нагадаў аб правілах выбудоўвання адносін з нашай краінай», — зазначыла вядучая, але дадала, што гэта «датычыць не толькі Расійскай Федэрацыі».
У сюжэце пераслухалі тэзіс Лукашэнкі пра тое, што «суверэнітэт, незалежнасць — непарушныя, і ўсякія размовы ў нас ці там інакш — гэта значыць здрада інтарэсам беларускага народа. Мы з Расіяй як суверэнная і незалежная дзяржава», — паўтарыў Лукашэнка.
Лукашэнка лічыць, што ні ў адной з праграм саюзнай дзяржавы няма замаху на наш суверэнітэт. Таму, на ўсялякі выпадак, прэм’еру і віцэ-прэм’еру даручыў «жорстка з гэтага зыходзіць, ні налева, ні направа».
Паглуміліся вядучыя і з Пуціна. Яны згадалі пра «асаблівасці таймінгу кіраўніка РФ», што ён мае звычку спазняцца, таму невядома, у колькі пачнецца сустрэча. «Расіяне нам блізкія людзі, а блізкім людзям прынята дараваць іх маленькія слабасці», — рэзюмавалі на СТБ.
Хто тая жанчына, якую Марзалюк у эфіры БТ абазваў «шваллю з Гродна», і што яна піша ў чатах? Расказваем пра доктарку Стэфановіч10
Каментары