STB: Rasija navat ćvika zrabić nie moža, a Pucin čałaviek z asablivaściami
Rasija — kraina, jakaja apynułasia ŭ niavykrutcy z-za sankcyj, adnak Biełaruś jak technałahična bolš raźvitaja vyratuje susiedniuju dziaržavu. Toje, što Kreml choča pahłynuć Biełaruś, — kanśpirałohija, a Pucinu jak rodnamu čałavieku my darujem jaho niedaskanałaści. Pra heta havaryli ŭ siužecie STB napiaredadni pryjezdu Pucina ŭ Biełaruś.
Prezident Rasii Uładzimir Pucin nie byŭ u Biełarusi 3,5 hoda, prytym što Łukašenka lotaŭ da jaho rehularna. Heta dało nahodu mierkavać, što Pucin jedzie cisnuć na Łukašenku i ŭ pytańniach intehracyi, i ŭ pytańniach udziełu Biełarusi ŭ vajnie.
Viadučyja siužeta davodziać, što hałoŭnaja tema pieramovaŭ — «pytańnie antysankcyjnaha ŭzajemadziejańnia», jakoje ciapier «aktualnaje dla Rasii navat bolš, čym dla Biełarusi».
Viadučyja pryhadali vykazvańni Valanciny Maćvijenka, jakaja adkryła dla siabie, što ŭ Rasii navat svaich ćvikoŭ nie vypuskajuć. «I tady rasijskija hubiernatary, jakija vybudoŭvali z nami adnosiny, pahladzieli na našu krainu pa-novamu».
Pavodle STB, raniej u Rasii pra Biełaruś dumali, što «my bulbu tolki vyroščvajem, a pa fakcie vysokatechnałahičnyja rečy my ŭmiejem rabić, a što nie ŭmiejem, chutka vučymsia».
Abmierkavali na STB i hučnyja zahałoŭki ŭ ŚMI, što Kreml choča pahłynuć Biełaruś.
Chacia temu vajny viadučyja całkam abminuli, adnak zaŭvažyli, što «dla tych, chto ŭ tanku, Alaksandr Łukašenka ŭ piatnicu 1001-šy, užo, napeŭna, raz nahadaŭ ab praviłach vybudoŭvańnia adnosin z našaj krainaj», — zaznačyła viadučaja, ale dadała, što heta «datyčyć nie tolki Rasijskaj Fiederacyi».
U siužecie pierasłuchali tezis Łukašenki pra toje, što «suvierenitet, niezaležnaść — nieparušnyja, i ŭsiakija razmovy ŭ nas ci tam inakš — heta značyć zdrada intaresam biełaruskaha naroda. My z Rasijaj jak suvierennaja i niezaležnaja dziaržava», — paŭtaryŭ Łukašenka.
Łukašenka ličyć, što ni ŭ adnoj z prahram sajuznaj dziaržavy niama zamachu na naš suvierenitet. Tamu, na ŭsialaki vypadak, premjeru i vice-premjeru daručyŭ «žorstka z hetaha zychodzić, ni naleva, ni naprava».
Pahłumilisia viadučyja i z Pucina. Jany zhadali pra «asablivaści tajminhu kiraŭnika RF», što jon maje zvyčku spaźniacca, tamu nieviadoma, u kolki pačniecca sustreča. «Rasijanie nam blizkija ludzi, a blizkim ludziam pryniata daravać ich maleńkija słabaści», — reziumavali na STB.
Ciapier čytajuć
Bližejšym časam buduć vyzvaleny bolš za 150 palitźniavolenych27
Kamientary