Міністэрства антыманапольнага рэгулявання і гандлю зноў дамовілася з прадстаўнікамі буйных беларускіх гандлёвых сетак аб наданні сацыяльных зніжак некаторым катэгорыям пакупнікоў. Пра гэта са спасылкай на кіраўніка МАРГ Аляксея Багданава паведамляе БелТА.
Гэта ўжо другое прадаўжэнне дамоўленасці аб наданні сацыяльна неабароненым групам насельніцтва дадатковай зніжкі ў памеры 10% на шэраг тавараў. Цяпер яно будзе дзейнічаць да сакавіка 2023 года.
Па словах міністра, праграма сацыяльных зніжак карысталася вялікай папулярнасцю: у крамах выдалі звыш 1,5 млн зніжкавых картак, пачынаючы са студзеня беларусы сукупна змаглі ашчадзіць каля 21 млн рублёў.
Удзельнікі праграмы (14 гандлёвых сетак), а таксама тавары, якія трапляюць пад зніжкі, застаюцца ранейшымі.
Упершыню праграму сацыяльных зніжак запусцілі 17 студзеня 2022 года. Зніжка ў памеры 10% даецца пенсіянерам, інвалідам, шматдзетным сем'ям і малазабяспечаным людзям. З ёй можна купіць танней, напрыклад, хлеб, муку, аўсяныя шматкі, макарону, ялавічыну, свініну, курынае мяса, малако, а таксама некаторую гародніну і садавіну.
Улетку ўлады казалі, што зніжка, магчыма, будзе павялічаная з 10 да 15%, але пакуль усё застаецца па-ранейшаму.
Каментары