Працоўная група Адміністрацыі прэзідэнта без папярэджання правяла рэйдавую праверку працы віцебскіх выканкамаў.
Працоўная група Адміністрацыі прэзідэнта Беларусі 10—11 лістапада без папярэджання правяла рэйдавую праверку працы выканаўчых і распарадчых органаў улады ў Віцебску па выкананні патрабаванняў дырэктывы № 2 «Аб мерах па далейшай дэбюракратызацыі дзяржаўнага апарата».
Як паведамляе прэс‑служба прэзідэнта, падчас праверкі выяўлены шэраг сур’ёзных недахопаў. У прыватнасці, старшыня Віцебскага гарвыканкама Віктар Мікалайкін пачаў прыём грамадзян па асабістых пытаннях з паўтарагадзінным спазненнем. У выніку ўтварылася чарга з амаль 10 чалавек. Інфармацыя аб змене графіку прыёму не была размешчана.
На працоўным месцы не было начальніка аддзела па працы і сацыяльнай абароне Віцебскага гарвыканкама Алены Капусцінай, якая таксама павінна была весці прыём грамадзян па асабістых пытаннях.
«Ёсць дакладны рэгламентаваны парадак прыёму грамадзян па асабістых пытаннях, зацверджаны прэзідэнтам Беларусі, які неабходна няўхільна выконваць. Гэта святая справа для кожнага кіраўніка», — пракаментаваў сітуацыю кіраўнік Адміністрацыі прэзідэнта Уладзімір Макей.
Апрача таго, у гарвыканкаме не наладжана электроннае ўзаемадзеянне з іншымі структурнымі падраздзяленнямі і арганізацыямі пры ажыццяўленні адміністрацыйных працэдур. Сайт гарвыканкама ўтрымлівае неактуальную інфармацыю аб парадку ажыццяўлення адміністрацыйных працэдур гарвыканкамам і яго структурнымі падраздзяленнямі. Гарачая лінія Віцебскага гарвыканкама працуе толькі адзін дзень на месяц, і пры гэтым ні адзін указаны тэлефон не адказваў.
Вынікі праведзенай праверкі будуць паведамленыя кіраўніку дзяржавы. Адміністрацыя прэзідэнта працягне практыку правядзення аналагічных раптоўных праверак па пытаннях дэбюракратызацыі дзяржаўнага апарата ў іншых рэгіёнах. За выяўленыя недахопы і хібы ў працы спагнанні будуць вельмі жорсткія, зазначаецца ў паведамленні прэс‑службы.
Цяпер чытаюць
Пагражаў вайскоўцам раскрыць, хто з іх гомасэксуал, каб выпытаць сакрэты і прадаць Украіне. Вось за што адыёзны функцыянер БРСМ атрымаў 17 гадоў калоніі2
Каментары